މޯލްޑިވްސް ކަރެކްޝަނަލް ސާވިސްގެ 5 ޕްރިޒަން އޮފިސަރުންގެ މައްޗަށް ޕްރޮސިކިއުޓާ ޖެނެރަލް އޮފީސް (ޕީޖީ އޮފީސް) އިން ދައުވާކޮށްފިއެވެ.
ހުކުރު ދުވަހު ޕީޖީ އޮފީހުން ނެރުނު ބަޔާނެއްގައި ބުނެފައިވަނީ މޯލްޑިވްސް ޕޮލިސް ސާވިސްއިން ތަހުގީގުކުރި މައްސަލައެއްގައި ކަރެކްޝަންސްގެ ބައެއް އޮފިސަރުން ގާނޫނީ ޒިންމާތަކާ ހިލާފުވެ، ވަޒީފާގައި ގާނޫނާ ހިލާފު އަމަލެއް ހިންގުމަށްފަހު ނާޖާއިޒު މާލީ ފައިދާއެއް ހޯދައި، ވަޒީފާއާއި ނުގުޅޭ މާލީ މުއާމަލާތްތަކެއް ހިންގަމުންދާ ކަމުގެ މައްސަލައެއް ލިބިފައިވާ ކަމަށެވެ.
މި މައްސަލައިގައި ހިމެނޭ ފަސް މީހެއްގެ މައްޗަށް ބުރާސްފަތި ދުވަހު ކްރިމިނަލް ކޯޓުން ވަނީ ދައުވާ އުފުލާފައެވެ. ދައުވާ އުފުލާފައިވާ މީހުންގެ ތެރޭގައި ކޯޓުން ހާމަކޮށްފައިވާ މީހުންނަކީ، ޖިނާހު އަބްދުއްރަހީމް، އައިވަރީ ހައުސް، ރ. އުނގޫފާރު،
Advertisement
އަލީ ހިޝާމް، ބީޗް ހައުސް، ކ.މާފުށި، އަލީ ނާޒިމް، ތަރާންގޭ، ހދ. ނޭއިކުރެންދޫ، މުހައްމަދު ފަތޫހު ފަތުހުﷲ، ކުއްޅަވައްގެ، ގއ. ވިލިނގިލި އަދި އަލީ އަޝްފާގު، ކާމިނޭގޭ، ނ.ލަންދޫއެވެ.
ޖިނާހު އާއި ހިޝާމްގެ މައްޗަށް ދައުލަތުން އުފުލާފައި ވަނީ އޮފިޝަލް ކެޕޭސިޓީ ނަހަމަ ގޮތުގައި ބޭނުންކުރުމާއި މަނީ ލޯންޑަރިންގެ އިތުރުން ނުހައްގު މުއްސަނދިކަން ހޯދާ ލިބިގަތުމުގެ ދައުވާއެވެ.
ނާޒިމް، ފަތޫހް އަދި އަޝްފާގުގެ މައްޗަށް ދައުލަތުން އުފުލާފައި ވަނީ އޮފިޝަލް ކެޕޭސިޓީ ނަހަމަ ގޮތުގައި ބޭނުންކުރުމާއި ނުހައްގު މުއްސަނދިކަން ހޯދާ ލިބިގަތުމުގެ ދައުވާއެވެ.
ޕީޖީ އޮފީހުން ބުނީ އެ މައްސަލައިގައި ބާކީ ތިބި މީހުންގެ މައްޗަށް ދައުވާ ނުކުރަން މިވަގުތަށް ނިންމާފައި ވަނީ އެކަށީގެންވާ ހެކި ނެތުމުން ކަމަށެވެ.
އެގޮތުން އެކަމުގައި ބައިވެރިވިކަމަށް ޝައްކުކުރެވޭ އިތުރު މީހުންނަށް ދައުވާ ކުރުމުގެ ނިންމުން ނިންމާނީ މިހާރު ކުރިއަށްދާ ތަހުގީގު ނިމުމުން ކަމަށް ފާހަގަކޮށްފައިވެއެވެ.
ޖަލުތަކަށް މަސްތުވާތަކެތި އެތެރެކުރި މައްސަލައިގައި ޖަލުތަކުގެ 13 އޮފިސަރުންގެ މައްޗަށް ދައުވާ އުފުލާފައި ވަނީ އޮގަސްޓް މަހުގެ 10 ވަނަ ދުވަހުއެވެ.
މި މައްސަލައިގައި ހިމެނެނީ ކަރެކްޝަންސްގައި މިހާރުވެސް ވަޒީފާ އަދާކުރާ ޕްރިޒަން އޮފިސަރުންނާއި މަގާމުން އިސްތިއުފާދީފައިވާ ޕްރިޒަން އޮފިސަރުންނެވެ.
ހޯމް މިނިސްޓަރު އަލީ އިހުސާން، އިސްތިއުފާ ދިން އޮފިސަރުންގެ މައްޗަށް ޖިނާއީ ދައުވާ އުފުލާނެކަން ކަށަވަރުކޮށްދީފައިވާއިރު، ސަރުކާރުން މިކަމާ ގުޅޭ އެއްވެސް މީހެއް އިސްތިސްނާ ނުކުރާނެ ކަމަށާއި މައްސަލައިގައި ކުށްވެރިވާ ހުރިހާ ފަރާތްތަކާ މެދު ހަރުކަށި ފިޔަވަޅު އަޅާނެ ކަމަށް ބުނެފައިވެއެވެ.
