ސިނަމާލެ’ ބްރިޖުގެ ޓްރެފިކް ލައިޓް ކައިރީގައި ހުކުރު ދުވަހު ހިނގި ނުރައްކާތެރި އެކްސިޑެންޓެއްގައި ދެ ސައިކަލެއް ޖެހި ތިން މީހަކަށް އަނިޔާވެއްޖެއެވެ.
މި އެކްސިޑެންޓް ހިނގާފައިވަނީ މިއަދު ހެނދުނު 5:26 ހާއިރުއެވެ.
މޯލްޑިވްސް ޕޮލިސް ސަރވިސްއިން މީޑިއާއަށް ފޮނުވި މެސެޖެއްގައި ބުނެފައިވަނީ، ދެ ސައިކަލެއް ޖެހި ނުރައްކާތެރި އެކްސިޑެންޓް ހިނގި މައްސަލަ އެ އޮތޯރިޓީއަށް މިއަދު ހެނދުނު ރިޕޯޓްކޮށްފައިވާކަމަށެވެ.
Advertisement
އެކްސިޑެންޓްގައި އަނިޔާވި ތިން މީހަކަށް މިހާރު ހޮސްޕިޓަލުގައި ފަރުވާ ދެމުން އަންނަ ކަމަށް ވެސް ފުލުހުން ބުންޏެވެ.
މިކަމާ ގުޅިގެން ފުލުހުން ތަފްސީލުކޮށްދިން ގޮތުގައި އެއް ސައިކަލު ދުއްވަން އިން 21 އަހަރުގެ މީހާ އާއި ފަހަތުގައި އިށީނދެގެން އިން 19 އަހަރުގެ އަންހެން ކުއްޖާއަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފަރުވާ ދެމުން އަންނައިރު، 43 އަހަރުގެ މުސްކުޅި މީހަކަށް އޭޑީކޭ ހޮސްޕިޓަލުގައި އަންނަނީ ފަރުވާ ދެމުންނެވެ.
މި އެކްސިޑެންޓް ފުލުހުން ދަނީ ތަހުގީގު ކުރަމުންނެވެ.
ނުރައްކާތެރި އެކްސިޑެންޓުތައް، ހާއްސަކޮށް މާލެ ސަރަހައްދުގައި މަގުމަތީގެ އެކްސިޑެންޓްތައް ވަނީ އިތުރުވެފައެވެ. އަދި ދާދި ފަހަކުން، އޮގަސްޓް މަހު ހުޅުމާލެ' ފޭސް 2 ގެ ވިނަރެސް ފްލެޓްސް ކައިރިން ކޮންޓްރޯލުން ނެއްޓިގެން ކާރެއް ވަނީ، މަގުގެ އެއްފަރާތުގައި ސައިކަލުގައި މަޑުކޮށްގެން އިން މީހެއްގެ ގައިގައި ޖެހި، ކާރު އައި ބާރުމިނުގައި ވިއްސައިގެން ގޮއްސައެވެ.
މަގުމަތީގެ ގަވައިދުތަކާ އެއްގޮތަށް އަމަލުކުރުމަކީ އެންމެންގެވެސް ޒިންމާއެއް ކަމަށް ބަލާ، މިފަދަ ނުރައްކާތެރި އެކްސިޑެންޓުތަކުން ސަލާމަތް ވުމަށް ހުރިހާ ފަރުދުންވެސް ސަމާލުވާންޖެހެއެވެ.
