އީރާނާ ދެކޮޅަށް އެމެރިކާ އާއި އިސްރާއީލުން ފަށާފައިވާ ހަނގުރާމައިގެ ފުރަތަމަ 100 ގަޑިއިރުގެ ތެރޭގައި އެކަނިވެސް، ވޮޝިންޓަނުން 3.7 ބިލިއަން އެމެރިކާ ޑޮލަރު ހަރަދުކޮށްފައިވާ ކަމަށް ދިރާސާއަކުން ދައްކައިފި އެވެ. މިއީ ދުވާލަކަށް ބަލާއިރު ގާތްގަނޑަކަށް 900 މިލިއަން ޑޮލަރުގެ ހަރަދެކެވެ.
ވޮޝިންޓަނަށް ނިސްބަތްވާ ތިންކް ޓޭންކެއް ކަމަށްވާ ސެންޓާ ފޯ ސްޓްރެޓީޖިކް އެންޑް އިންޓަރނޭޝަނަލް ސްޓަޑީޒް (ސީ.އެސް.އައި.އެސް) އިން ތައްޔާރުކުރި ރިޕޯޓެއްގައި ބުނެފައިވާ ގޮތުން، މި ބޮޑު ހަރަދުގެ ބޮޑު ބަޔަކީ ހަތިޔާރާއި ގޮވާތަކެއްޗަށް ހިނގާފައިވާ ހަރަދެވެ. ހުކުރު ދުވަހު ހަނގުރާމައަށް ހަތް ދުވަސް ފުރުނުއިރު، އެމެރިކާއިން ދަނީ ސްޓެލްތު ބޮން ތަކާއި ކުރިއަރާފައިވާ ޒަމާނީ ހަތިޔާރުގެ ނިޒާމުތައް ބޭނުންކޮށްގެން އީރާނަށް ހަމަލާދެމުންނެވެ.
ދިރާސާވެރިން ކަމަށްވާ މާކް ކެންސިއަން އަދި ކްރިސް ޕާކް ފާހަގަކުރި ގޮތުގައި، މިހާތަނަށް ހިނގި 3.7 ބިލިއަން ޑޮލަރުގެ ތެރެއިން ބަޖެޓުގައި ހިމެނިފައިވަނީ ވަރަށް ކުޑަ މިންވަރެކެވެ. ބަޖެޓުން ބޭރުން 3.5 ބިލިއަން ޑޮލަރު ހަރަދުވެފައިވާއިރު، މިއީ ޓްރަމްޕްގެ ސަރުކާރަށް ސިޔާސީ ގޮތުން ކުރިމަތިވާނެ ބޮޑު ގޮންޖެހުމަކަށް ވާނެ އެވެ. އަދި މީގެ ސަބަބުން ހަނގުރާމައާ ދެކޮޅަށް ތެދުވާ ފަރާތްތަކަށް އިތުރު ބާރެއް ލިބިގެންދާނެ ކަމަށްވެސް އެ ފަރާތްތަކުން ބުނެ އެވެ.
އެމެރިކާގެ އެތެރޭގެ ދިރިއުޅުމުގެ ހަރަދު ބޮޑުވުމާއި، އިންފްލޭޝަން އަދި ހަނގުރާމައިގެ ސަބަބުން ތެލުގެ އަގު އުފުލުމަކީ އެމެރިކާގެ ރައްޔިތުންގެ މެދުގައި މި ހަނގުރާމައަށް އޮތް ތާއީދު ކުޑަވެގެންދާނެ ކަމެކެވެ. މީގެ އިތުރުން، ބޭރު ގައުމުތަކުގެ ހަނގުރާމައިގެ ތެރެއަށް ނުވަންނާނެ ކަމަށް ވައުދުވި ޓްރަމްޕްގެ "އެމެރިކާ ފަސްޓް" ސަޕޯޓަރުންގެ މެދުގައިވެސް މިކަމުގެ ސަބަބުން ވަނީ ހިޔާލުތަފާތުވުންތައް އުފެދިފަ އެވެ.
މި ދިރާސާއިން ދައްކާ ގޮތުގައި ހަނގުރާމައިގެ ފުރަތަމަ 100 ގަޑިއިރު ތެރޭގައި އެމެރިކާއިން ވަނީ 2،000 އަށްވުރެ ގިނަ އެކި ބާވަތުގެ ހަތިޔާރު ބޭނުންކޮށްފަ އެވެ. މި ހަތިޔާރުތައް އަލުން ހޯދުމަށް އެކަނިވެސް 3.1 ބިލިއަން ޑޮލަރު ހަރަދުވާނެ ކަމަށް ލަފާކުރެވެ އެވެ. އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވެފައިވަނީ އީރާނަށް ދޭ ހަމަލާތައް ކުރިއަށް އޮތް ތަނުގައި އިތުރަށް ވަރުގަދަ ކުރާނެ ކަމަށެވެ.
މި ހަނގުރާމައިގައި އިންސާނީ ގޮތުން ލިބެމުންދާ ގެއްލުންތައްވެސް ވަނީ އިންތިހާއަށް ބޮޑުވެފަ އެވެ. އީރާނުގެ ރެޑް ކްރެސެންޓުން ބުނާ ގޮތުގައި، މިހާތަނަށް އީރާނުން 1,332 އަށްވުރެ ގިނަ މީހުން ވަނީ މަރުވެފަ އެވެ. އޭގެ ތެރޭގައި 181 ކުޑަކުދިން ހިމެނޭ ކަމަށް ޔުނިސެފުން ބުނެ އެވެ. ލުބުނާނުގައި އިސްރާއީލުން ދެމުންދާ ހަމަލާތަކުގައި މަރުވި މީހުންގެ އަދަދު 123 އަށް އަރާފައިވާއިރު، މި ހަނގުރާމައިގައި އެމެރިކާގެ 6 ސިފައިންނާއި، އިސްރާއީލުގެ 11 މީހުން އަދި އަރަބި ގައުމުތަކުން 9 މީހަކު ވަނީ މަރުވެފަ އެވެ.
