ޕްރޮސިކިއުޓާ ޖެނެރަލް ހުސައިން ޝަމީމް ބުރާސްފަތި ދުވަހު ވިދާޅުވީ އޭނާގެ އިތުބާރު ނެތްކަމުގެ މައްސަލަ ބިނާވެފައިވަނީ "އަސާސެއް ނެތް، ބައުވެފައިވާ އަދި ސުވާލުކޮށް ޖަވާބު ދީފައިވާ" ތުހުމަތުތަކެއްގެ މައްޗަށް ކަމަށެވެ. އަދި މި ތުހުމަތުތައް އަމާޒުކޮށްފައިވަނީ، ނާޖާއިޒު ނުފޫޒު ނުފޯރުވޭނެ އިދާރާއެއް އުފެއްދުމުން ކަމަށްވެސް އޭނާ ވިދާޅުވިއެވެ.
ޝަމީމްގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހެޅީ ވެރިކަން ކުރާ މައި ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ އެންމެ އިސް ސިޔާސީ ބޭފުޅެއް ކަމަށްވާ ހުޅުދޫ ދާއިރާގެ މެމްބަރު މުހައްމަދު ޝާހިދެވެ.
ޝަމީމް ޖުޑިޝަރީ ކޮމިޓީއަށް ހާޒިރުކުރީ ބުރާސްފަތި ދުވަހުގެ ހެނދުނު، ޝަމީމްއާއި ދެކޮޅަށް ހުށަހެޅި މައްސަލައަށް ޖަވާބުދާރީވުމަށެވެ. ކޮމެޓީގެ ނޯޓިސްގައި އޭނާގެ މައްޗަށް ކުރެވުނު ތުހުމަތުތަކުގެ އަސްލު ތަފްސީލެއް ނެތް ކަމަށް ވިދާޅުވެފައި ވާއިރު، އެދިފައި އޮތީ ސީދާ ތުހުމަތުތައް ނޭނގި ޖަވާބެއް ދިނުމަށް ކަމަށްވެސް ވިދާޅުވިއެވެ. މިއީ ސާފުކޮށް ނެޗުރަލް ޖަސްޓިސްގެ އުސޫލުތަކާ ހިލާފު ކަމެއް ކަމުން މިއީ ޖަވާބު ދިނުމަށް ލިބޭނެ އެކަށީގެންވާ ފުރުސަތެއް ކަމަށް ގަބޫލު ނުކުރަށްވާ ކަމަށްވެސް ޝަމީމް ވަނީ ވިދާޅުވެފައެވެ.
Advertisement
ޝަމީމް ވަނީ އޭނާގެ މައްޗަށް ކުރެވުނު ތުހުމަތުތައް ކަނޑައެޅިގެން ދޮގު ކުރައްވާފައެވެ.
ޝަމީމް ވިދާޅުވީ އެމަނިކުފާނުގެ މައްޗަށް ކުރާ ތުހުމަތުތަކަކީ ހެޔޮ ނިޔަތެއްގައި ކުރާ ތުހުމަތުތަކެއް ކަމަށް ގަބޫލު ނުކުރައްވާ ކަމަށެވެ. އޭނާ ވިދާޅުވީ އަސާސެއް ނެތް ދައުވާތަކުން ހަމަލާ ދިނުމުގެ ބަދަލުގައި، އިސްތިއުފާ ދެއްވަން އެންގި ނަމަ އިސްތިއުފާދޭން ތައްޔާރަށް ހުންނެވި ކަމަށެވެ.
ޝަމީމް ވިދާޅުވީ ސަރުކާރުގެ ވަޒީރުން ހިމެނޭ ގޮތަށް ސަރުކާރުގެ އިސް ގިނަ އޮފިޝަލުންނާ ބައްދަލު ކުރައްވާފައިވާ ކަމަށާއި ޕްރޮސެކިއުޓާ ޖެނެރަލް އޮފީހުގެ ހިންގުމާ ގުޅޭ ގޮތުން އެއްވެސް ކަންބޮޑުވުމެއް އޮތްތޯ ސުވާލު ކުރުމުން އެއްވެސް ޝަކުވާއެއް ނުކުރާ ކަމަށެވެ.
ޝަމީމް ވިދާޅުވީ އޭނާ މަގާމުން ވަކިކުރަނީ ގާނޫނާ ހިލާފު ކަމެއް ކުރުމުން ނުވަތަ އިޚްލާސްތެރިކަން ނެތުމުން ނޫން ކަމަށާއި، އޭގެ ބަދަލުގައި ނުފޫޒުން އެއްކިބާވެ މަސައްކަތް ކުރާ މުއައްސަސާއެއްގެ ގޮތުގައި ޕީޖީއޯ ބައްޓަން ކުރައްވާތީކަމަށް ވިދާޅުވިއެވެ.
މަޖިލީހަށް ފޮނުއްވި ސިޓީގައި، ޝަމީމް ވަކިކުރަން ޖެހޭ މައިގަނޑު 8 ސަބަބެއް ޝާހިދު ފާހަގަކުރައްވާފައިވެއެވެ. އެއީ، ކުރީގެ ޓޫރިޒަމް މިނިސްޓަރު އަލީ ވަހީދުގެ މައްޗަށް އުފުލާފައިވާ ޖިންސީ ކުށުގެ ދައުވާ އެކަށީގެންވާ ގޮތެއްގައި ނުގެންދިއުމާއި، ކުރީގެ ޔޫތު މިނިސްޓާރ އަހުމަދު މަހުލޫފުގެ މައްސަލަ އިސްތިއުނާފު ނުކުރަން ނިންމުމާއި، ސަފާރީއެއްގައި ބިދޭސީއެއް ރޭޕު ކުރި ކަމަށް ތުހުމަތު ކުރެވޭ ދައުވާ އަނބުރާ ގެންދިއުމާއި، ރައްޔިތުންގެ މަޖިލީހުގެ މިލަންދޫ ދާއިރާގެ ކުރީގެ މެންބަރު އަލީ ރިޒާގެ ކުންފުނިން 2015 އިން ފެށިގެން އެ ކުންފުނީގެ ސްޕޮންސާރޝިޕްގެ ދަށުން ރާއްޖެ ގެނައި ބިދޭސީން ލައްވާ މަސައްކަތް ކުރުވުމަށްފަހު މުސާރަ ނުދީ ބިރުދައްކާ އެމީހުން އެކްސްޕްލޮއިޓް ކޮށް އެމީހުން ޓްރެފިކް ކޮށްފައިވާ ކަމަށް ރިޒާގެ މައްޗަށް ކުރި ދައުވާ ހުއްޓާލުމާއި، ބަނގުރާ ބުއިމާ ބަނގުރާ ބޭނުންކުރުމާއި ގުޅުންހުރި 77 މައްސަލައެއް ވަކި ކުރުމާއި، ޕީޖީ އޮފީހުގެ މުވައްޒަފަކާއި ގުޅޭ ގޮތުން މަސްތުވާތަކެތި ބޭނުން ކުރުމާއި ކީރިތި ރަސޫލާއަށް ފުރައްސާރަ ކުރުމާއި އެއް ޖިންސުގެ ގުޅުން ހިންގުމުގެ މައްސަލަތަށް ބެލެހެއްޓުމާއި، ކޮވިޑްގެ ހާލަތާއި ގުޅިގެން ހެލްތު މިނިސްޓްރީން ވެންޓިލޭޓަރުތައް ހޯދުމަށް ދައުލަތުން ބޮޑު ހޭދައެއްކޮށް އެ ވެންޓިލޭޓަރުތައް ނުލިބުނު މައްސަލައިގެ ތަހުޤީގު ފުރިހަމަކޮށް ތަކުރާރުކޮށް ހުށަހެޅުމުން ވެސް އެ މައްސަލައިގައި ދައުވާ ނުކުރެއްވުމަށް ނިންމުމާއި، އަދި ޕީޖީ އޮފީހުގެ މުވައްޒަފުންތަކެއްގެ މެދުގައި ތަފާތު ކުރުން ގެންގުޅެ ރާއްޖެއިން ބޭރުގެ ދަތުރުތައްވެސް ވަކި ބޭފުޅަކަށް ލިބޭގޮތް ހައްދަވައި މުވައްޒަފުންނަށް ޕްރޮމޯޝަން ދިނުމުގައި ވެސް ތަފާތުކުރުން ހިމެނެއެވެ.
ޝަމީމް ޕްރޮސިކިއުޓާ ޖެނެރަލްގެ މަގާމަށް އައްޔަން ކުރެއްވީ ރައީސް އިބްރާހިމް މުހައްމަދު ސޯލިހުގެ ދައުރުގައި، ޑިސެމްބަރު 8 2019 ވަނަ އަހަރުއެވެ. އޭރު އެމަނިކުފާނަށް ޕީއެންސީގެ ލީޑަރުންގެ ގޮތުގައި ތިއްބެވި ބޭފުޅުންގެ ފާޑުކިޔުންތައް ވަނީ އަމާޒުވެފައެވެ.
ޝަމީމް ވަނީ އިނގިރޭސިވިލާތުގެ ޔުނިވާސިޓީ އޮފް ސަސެކްސް އިން ޖިނާއީ ގާނޫނާއި ޖިނާއީ އަދުލުގެ ދާއިރާއިން މާސްޓާ އޮފް ލޯ ހާސިލް ކުރައްވާފައެވެ. އަދި މިސްރުގެ އަލް އަޒްހަރު ޔުނިވާސިޓީން ޝަރީއަތާއި ގާނޫނީ ދާއިރާއިން ބެޗްލަރ އޮފް އާޓްސް ވަނީ ހާސިލް ކުރައްވާފައެވެ. ޕްރޮސިކިއުޓާ ޖެނެރަލްގެ މަގާމަށް އައްޔަން ކުރެއްވުމުގެ ކުރިން ޝަމީމް ވަނީ ޕްރޮސިކިއުޓާ ޖެނެރަލްގެ އޮފީހާއި އެޓާނީ ޖެނެރަލް އޮފީހުގެ އެހެން މަތީ މަގާމުތަކުގައި ވެސް މަސައްކަތް ކުރައްވާފައެވެ.
