އެލީޓް ރަނާސް މޯލްޑިވްސް އިން އިންތިޒާމުކޮށްގެން ބާއްވާ "ހުޅުމާލެ ރަން 2026" ގެ ޓައިޓަލް ސްޕޮންސަރަކަށް ރާއްޖޭގެ އެންމެ ބޮޑު އިންޝުއަރެންސް ކުންފުނި، އެލައިޑް އިންޝުއަރެންސް ހަމަޖައްސައިފިއެވެ.
"އެލައިޑް ހުޅުމާލެ ރަން 2026" ގެ ނަމުގައި ކުރިއަށްގެންދާ މި ދުވުން ބޭއްވުމަށް ތާވަލުކޮށްފައިވަނީ 2026 ވަނަ އަހަރުގެ މެއި މަހުގެ 22 ވާ ހުކުރު ދުވަހުއެވެ. މި ހަރަކާތް ކުރިއަށްދާނީ ހުޅުމާލޭ ސެންޓްރަލް ޕާކް ސަރަހައްދުގައެވެ. މިއީ ދުޅަހެޔޮ ދިރިއުޅުމަކަށް ލޯބިކުރާ ފަރާތްތަކުން ނުހަނު ބޮޑު އިންތިޒާރެއް ކުރަމުން އަންނަ، ރާއްޖޭގައި ބޭއްވޭ ފާހަގަކޮށްލެވޭ އެއް ދުވުމެވެ.
މި ދުވުމުގައި އެކި އުމުރުފުރާތަކަށް ބައިވެރިވެވޭނެހެން ހަތަރު ކެޓަގަރީއެއް ވަނީ ހިމަނާފައެވެ. އެގޮތުން:
- އާއިލާތަކަށް ހާއްސަ 1 މައިލް ފެމިލީ ރަން
- 5 ކިލޯމީޓަރުގެ ދުވުން
- 10 ކިލޯމީޓަރުގެ ދުވުން
- ތަޖުރިބާކާރު ދުވުންތެރިންނަށް އަމާޒުކޮށްގެން ބާއްވާ 21 ކިލޯމީޓަރުގެ ހާފް މެރަތަން
މި ދުވުމުގެ އެންމެ ހާއްސަ އެއް ކަމަކީ، ދުވުމުގައި ބައިވެރިވާ ހުރިހާ ދުވުންތެރިންނަށްވެސް އެލައިޑް އެކްސިޑެންޓަލް ކަވަރޭޖެއް ފޯރުކޮށްދިނުމެވެ. އެލައިޑުން ހާމަކުރި ގޮތުގައި، ކޮންމެ ދުވުންތެރިއަކަށްވެސް މިފަދަ ހަރަކާތްތަކުގައި ދިމާވެދާނެ ކުއްލި ހާދިސާއަކަށް ރައްކާތެރިވެ ތިބުމަކީ އެ ކުންފުނިން ވަރަށް ބޮޑު އިސްކަމެއްދޭ ކަމެެއް ކަމަށް ބުންޏެވެ.
މީގެ އިތުރުން، ދުވުން އިތުރަށް ފޯރިގަދަ ކުރުމުގެ ގޮތުން އެކި ކެޓަގަރީތަކުން ވަނަތައް ހާސިލްކުރާ ފަރާތްތަކަށް އެލައިޑުން ވަނީ އަގުހުރި އިނާމުތަކެއް ހުށަހަޅާފައެވެ. އޭގެ ތެރޭގައި އެލައިޑް ހެލްތު ކަވަރޭޖާއި އަހަރީ ޓްރެވަލް ކަވަރޭޖް ހިމެނެއެވެ.
"އެލައިޑް ހުޅުމާލެ ރަން" އަކީ ހަމައެކަނި ކުޅިވަރު ހަރަކާތެއް ނޫން ކަމަށާއި، މިއީ އެންމެން ގުޅިގެން އިޖުތިމާއީ ރޫހު އާލާކުރާނެ މުހިންމު މާހައުލަކަށް ވެގެންދާނެ ކަމަށް އެލައިޑުން ބުންޏެވެ. އަދި އެލައިޑުން ވަނީ މި ބޮޑު ހަރަކާތުގެ ތެރެއިން ދުވުންތެރިންގެ ރައްކާތެރިކަން ކަށަވަރުކޮށްދިނުމަކީ އެ ކުންފުންޏަށް ލިބޭ ބޮޑު ފަހުރެއްގެ ގޮތުގައި ފާހަގަކޮށްފައެވެ.
މި ބޮޑު ދުވުމުގައި ޖުމްލަ 2,500 އަށްވުރެ ގިނަ ބައިވެރިން ބައިވެރިވާނެ ކަމަށް ލަފާކުރެއެވެ. މިއީ އިޖުތިމާއީ އެއްބައިވަންތަކަމުގެ އިތުރުން ދުޅަހެޔޮ ސިއްހަތެއްގެ މުހިންމުކަން މުޖުތަމައަށް ދައްކުވައިދިނުމުގެ މަގުސަދުގައި ބާއްވާ ހަރަކާތެކެވެ.
