ޓޫރިޒަމް މިނިސްޓްރީން ހާމަކޮށްފައިވާ ގޮތުގައި މިއަދާ ހަމައަށް ރާއްޖެ އައި ފަތުރުވެރިންގެ ޖުމްލަ އަދަދު ވަނީ 1.3 މިލިއަނަށް އަރާފައެވެ. މިއީ މިދިޔަ އަހަރުގެ މި މުއްދަތުގައި ފަތުރުވެރިން ރާއްޖެ އައިސްފައިވާ މިންވަރާ އަޅާބަލާއިރު %10.4 އިތުރުވުމެއްކަން ފާހަގަކޮށްލެވެއެވެ.
މިނިސްޓްރީގެ ދުވަހުން ދުވަހަށް ލިބޭ އަޕްޑޭޓްތަކަށް ބަލާއިރު، އޮގަސްޓް 19 ވަނަ ދުވަހުގެ ނިޔަލަށް ޖުމްލަ 1،304،236 ފަތުރުވެރިން އައިސްފައިވާއިރު، މިއީ 2023 ވަނަ އަހަރުގެ މި މުއްދަތުގައި ރާއްޖެ އައިސްފައިވާ 1،181،093 ފަތުރުވެރިންނާ އަޅާބަލާއިރު %10.4 އިތުރުވުމެކެވެ. އަދި އޮގަސްޓް 1–19 އާ ދެމެދު ރާއްޖެއަށް އައި ފަތުރުވެރިންގެ ތަފާސް ހިސާބުތައް ދައްކާގޮތުން މިއީ މިދިޔަ އަހަރުގެ މި މުއްދަތުގައި ރާއްޖެ އައި 105،866 މީހުންނާ އަޅާބަލާއިރު %14.5 ގެ ބޮޑު ކުރިއެރުމެކެވެ.
ރިޕޯޓުގައި ފާހަގަކޮށްފައިވާ ގޮތުގައި 2024 ވަނަ އަހަރު އެންމެ ގިނައިން ރާއްޖެ އައިސްފައިވަނީ ޗައިނާގެ ފަތުރުވެރިން ކަމަށާއި، އެ ގައުމުން 184،632 މީހުން ޒިޔާރަތްކޮށްފައިވެއެވެ. ޗައިނާގެ ފަތުރުވެރިން އަންނަ ޖުމްލަ ފަތުރުވެރިންގެ އަދަދަކީ ރާއްޖެއަށް ޒިޔާރަތް ކުރާ ފަތުރުވެރިންގެ %14.2 އެވެ. ޗައިނާއަށް ފަހު އެއްމެ ގިނައިން ރާއްޖެ އަންނަ ފަތުރުވެރިން ހިމެނޭ ގައުމު ތަކުގެ ތެރޭގައި 139،308 ޒިޔާރަތްތެރިންނާއެކު ރަޝިޔާ، އަދި 112،656 ޒިޔާރަތްތެރިންނާއެކު އިނގިރޭސިވިލާތް ހިމެނެއެވެ. ތަފާސް ހިސާބުތަކުން ދައްކާ ގޮތުގައި 400،000 އަށް ވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައި ވަނީ މި ގައުމުތަކުންނެވެ.
Advertisement
އެވްރެޖްކޮށް ދުވާލަކު 6،378 ފަތުރުވެރިން ރާއްޖެއަށް އަންނައިރު، ގިނަ ފަތުރުވެރިން ތިބެނީ ހަތް ދުވަހުގެ މުއްދަތަކަށެވެ. މި ކުރިއެރުމާއެކު މި އަހަރު ނިމޭއިރު ދެ މިލިއަން ފަތުރުވެރިން ގެނައުމުގެ ބޮޑު އަމާޒެއް ކަނޑައެޅުމަށް ސަރުކާރަށް ވަނީ ހިތްވަރު ލިބިފައެވެ. މި އަމާޒު ޙާޞިލުކުރުމުގެ މަޤްޞަދުގައި ސަރުކާރުން ދަނީ ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކާއި ގުޅިގެން ރާއްޖެ ޕްރޮމޯޓްކުރުމަށް އެކި ޕްލެޓްފޯމްތަކުގެ އެހީގައި މަސައްކަތް ކުރަމުންނެވެ.
