ކުރިއަށް އޮތް ލޯކަލް ކައުންސިލް އިންތިޚާބުގެ ކެމްޕޭނާ ދިމާކޮށް، ސަރުކާރު ހިންގާ ކޮންގްރެސް ކޯލިޝަނުން ކުރިމަތިލައްވާފައިވާ ކެންޑިޑޭޓުންނަށް، ގއ. ކޮލަމާފުށީގެ ރައްޔިތުންގެ ފަރާތުން އޮތް ވަރުގަދަ ތާއީދު ވަރަށް ފާޅުކަން ބޮޑު ގޮތެއްގައި ދައްކާލައިފިއެ ވެ.

މި ހަރަކާތަކީ ކައުންސިލް އިންތިހާބުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ސިޔާސަތުތަކަށް ތާއީދުކުރާ ކެންޑިޑޭޓުން ހޮވުމުގެ މުހިންމުކަން ހާމަކުރުމުގެ ގޮތުން އެ ރަށުގައި ކުރިއަށްގެންދިޔަ ހާއްސަ ހަރަކާތެކެވެ. މި ހަރަކާތުގައި ކޮލަމާފުށީގެ ގިނަ އަދަދެއްގެ ރައްޔިތުން ވަނީ މަގުތަކަށް ނުކުމެ، ސަރުކާރުގެ ތަރައްގީގެ ތަސައްވުރަށާއި ރައީސް މުޢިއްޒުގެ ކެންޑިޑޭޓުންނަށް އޮތް އިތުބާރު ހާމަކޮށްފަ އެވެ.

ކޮލަމާފުށީގައި ހަރަކާތްތެރިވާ ޕީއެންސީގެ އިސް ފަރާތްތަކުން އިސްނަގައިގެން ކުރިއަށްގެންދިޔަ މި ކެމްޕޭން ހަރަކާތްތަކުގައި، ރަށުގެ ތަރައްގީގެ މަޝްރޫޢުތައް ބާރުމިނުގައި ކުރިއަށް ގެންދިއުމަށްޓަކައި ސަރުކާރާ ގުޅިގެން މަސައްކަތް ކުރާނެ ކައުންސިލެއް އޮތުމުގެ މުހިންމުކަމާ ގުޅޭގޮތުން ވަނީ ވާހަކަދެކެވިފަ އެވެ. ރަށުގެ ރައްޔިތުންގެ ފަރާތުން ފެންނަމުންދާ މި ހޫނު ތަރުހީބަކީ، ރައީސް މުޢިއްޒުގެ ސަރުކާރަށް ކޮލަމާފުށީ ރައްޔިތުން ކުރާ ފުރިހަމަ ތާއީދުގެ ރަމްޒެކެވެ.

ކޮލަމާފުށީ ރައްޔިތުން ބުނަމުންދަނީ، ރަށުގެ ކުރިއެރުމަށާއި ރައްޔިތުންނަށް ބޭނުންވާ ހިދުމަތްތައް ފޯރުކޮށްދިނުމުގައި ސަރުކާރާ އެއްގަލަކަށް އަރާނެ ބަޔަކު ކައުންސިލްގައި ތިބުމަކީ ކޮންމެހެން ބޭނުންތެރި ކަމެއް ކަމަށެވެ. އެހެންކަމުން، ރައީސް މުޢިއްޒުގެ ކެންޑިޑޭޓުން ހޮވުމަށް އެ ރަށުގެ ރައްޔިތުން ތިބީ އަތްގުޅާލައިގެންކަން މި ހަރަކާތުން ވަނީ ސާފުކޮށްދީފަ އެވެ.

ކައުންސިލް އިންތިހާބަކީ ސަރުކާރުގެ ވައުދުތައް ރަށްރަށުގައި ތަންފީޒުކުރުމުގައި އެންމެ މުހިންމު ދައުރެއް އަދާކުރާނެ އެއް ތަނބު ކަމަށްވާތީ، މުޅި ރާއްޖޭގެ އެކި ކަންކޮޅުތަކުގައި ސަރުކާރު ކެންޑިޑޭޓުންނަށް ތާއީދު ހޯދުމުގެ މަސައްކަތް މިހާރު ދަނީ ވަރަށް ބާރަށް ކުރިއަށެވެ.