ރައްދު ޙަމަލާ ދިނުމުގެ ގޮތުން އީރާނުން މިއަދު އިސްރާއީލާއި ދިމާއަށް 125 އަށް ވުރެ ގިނަ މިސައިލް ފޮނުވާފައިވާއިރު، އިތުރު 35 ބެލިސްޓިކް މިސައިލް ވެސް ފޮނުވާލައިފި ކަމަށް އަސްކަރީ މަސްދަރުތަކުން ބުނެފިއެވެ.
މި މިސައިލްތަކުން އިސްރާއީލު ދިފާޢު ކުރުމަށް އެމެެރިކާ އާއި އިޓަލީ އާއި އިނގިރޭސިވިލާތުން ދަނީ މަސައްކަތް ކުރަމުންނެވެ. ނަމަވެސް އެ މީހުންގެ ދިފާއީ ނިޒާމުތަކަށް ބައެއް މިސައިލްތައް ނުހުއްޓުވި އިސްރާއީލުގެ ވައިގެ ސަރަހައްދަށް ވަދެ އެތައް ސިޓީއެއްގެ ތެރެއަށް އަމާޒު ވެފައިވާ ކަމަށް ޚަބަރު ލިބެއެވެ.
ހަމައެއާއެކު އީރާނުން ވަނީ ގަލްފް ސަރަޙައްދުގައިވާ އެމެރިކާގެ ބައެއް ބޭސް ތަކަށް ވެސް މިސައިލްތައް ފޮނުވާލާފައެވެ، އެގޮތުން ގަތަރު (ދޯހާގެ އަލް އުދައިދު އެއާ ބޭސް)، ޔުނައިޓެޑް އަރަބް އެމިރޭޓްސް (އަބޫދާބީ އަދި ދުބާއީ)، ކުވައިތު، ބަހްރެއިން (އެމެރިކާގެ ފަސްވަނަ ފްލީޓްގެ މަރުކަޒު)، އަދި ސައުދީ އަރަބިއްޔާ (ރިޔާޟް އަދި އިރުމަތީ ޕްރޮވިންސް)ގައިވާ ތަންތަނަށް މިސައިލް ފޮނުވާލާފައި ވެއެވެ. ނަމަވެސް އެ ގައުމުތަކުގެ ވައިގެ ދިފާއީ ނިޒާމުތަކުން ގިނަ މިސައިލް ހުއްޓުވާފައި ވެއެވެ.
މީގެ ތެރެއިން ޔޫއޭއީގައި އެކަކު މަރުވެފައިވާ ކަމަށް ރިޕޯޓްތައް ބުނެ އެވެ. ގަލްފް ގައުމުތަކުން ވަނީ ވައިގެ ސަރަހައްދު ވަގުތީ ގޮތުން ބަންދުކޮށްފައެވެ.
