ދުނިޔޭގެ މުނިފޫހިފިލުވުމުގެ ސިނާއަތުގައި ހަރަކާތްތެރިވާ އެންމެ ބޮޑު ދެ ކުންފުނި ކަމަށްވާ ޕެރަމައުންޓް ގްލޯބަލް އާއި ވޯނާ ބްރޯސް ޑިސްކަވަރީ އެއްކޮށްލުމަށް ކުރަމުންދާ މަސައްކަތުގެ ދަށުން، 111 ބިލިއަން ޑޮލަރުގެ ބޮޑު މުއާމަލާތެއް ކުރުމަށް ތައްޔާރުވެއްޖެ އެވެ. މި އެއްބަސްވުމާއި އެކު ސީ.އެން.އެންގެ ބެލެނިވެރިކަން ލިބޭނީ ޕެރަމައުންޓަށެވެ.
ވާނަރ ބްރަދާސް ޑިސްކަވަރީ ވިއްކުމުގެ މި ޑީލަކީ އެމެރިކާގެ ރައީސް ޑޮނަލްޑް ޓަރްމްޕް ވެސް ޝައުގުވެރިވި ޑީލެކެވެ.
މިހާރު ސީ.އެން.އެން. ހިންގަނީ 2022 ވަނަ އަހަރު އުފެދުނު އެމެރިކާގެ ވާނަރ ބްރަދާސް އިންނެވެ. އޭގެ ކުރިން ސީ.އެން.އެން. ހިންގީ ޓާނާ ބްރޯޑްކާސްޓިންގެ ދަށުންނެވެ. އެއީ 1980 އިން ފެށިގެންނެވެ.
މި ބޮޑު މުއާމަލާތަކީ މުނިފޫހިފިލުވުމުގެ ދާއިރާގައި މިހާތަނަށް ހިންގޭ އެންމެ ބޮޑު އެއް ވިޔަފާރީގެ އެއްބަސްވުމަށް ވެގެންދާނެ އެވެ.
މި މުއާމަލާތުގެ މަގު ފަހިވީ، މީގެ ކުރިން މި ބިޑުގައި ބައިވެރިވި ދުނިޔޭގެ އެންމެ ބޮޑު ސްޓްރީމިންގް ހިދުމަތް ކަމަށްވާ ނެޓްފްލިކްސް އިން އެ ކުންފުނީގެ ހުށަހެޅުން އަނބުރާ ގެންދިއުމާއި ގުޅިގެންނެވެ.
އެމެރިކާގެ މީޑިއާ ރިޕޯޓްތައް ބުނާ ގޮތުގައި، މި އެއްބަސްވުމަކީ ފަހުގެ ތާރީހެއްގައި މީޑިއާ ދާއިރާގައި ހިންގޭނެ އެންމެ ނުފޫޒުގަދަ ބަދަލެވެ. މި ބަދަލާއެކު، ވޯނަރ ބްރަދާސްގެ ދަށުގައިވާ ދުނިޔެއަށް މަޝްހޫރު ހުރިހާ ފިލްމު ސްޓޫޑިއޯތަކާއި، ޓީވީ ޗެނަލްތަކާއި، އަދި އެތައް ހާސް އުފެއްދުންތަކެއްގެ މިލްކުވެރިކަން ޕެރަމައުންޓްގެ ދަށަށް ބަދަލުވާނެއެވެ. މީގެ އިތުރުން ދެ ކުންފުނީގެ ސްޓްރީމިންގް ޕްލެޓްފޯމްތައް އެއްކޮށްލުމަކީވެސް އެކަށީގެންވާ ކަމެކެވެ.
މިފަދަ ބޮޑު ނިންމުމެއް ނިންމަން ޖެހުނު މައިގަނޑު ސަބަބަކީ ވާދަވެރިކަން އިންތިހާއަށް ބޮޑުވެ، ކުންފުނިތަކުގެ ހިންގުމުގެ ހަރަދުތައް އިތުރުވަމުން ދިއުމެވެ. ހާއްސަކޮށް އެޕަލް އަދި އެމެޒޯން ފަދަ ޓެކްނޮލޮޖީގެ ބޮޑެތި ކުންފުނިތަކުން މި ސިނާއަތަށް ވަދެ، ބޮޑެތި އިންވެސްޓްމަންޓްތަކެއް ކުރަމުންދާތީ، އާދަޔާހިލާފު ބޮޑު މާކެޓް ހިއްސާއެއް ހޯދުމަށް މި ދެ ކުންފުނި އެއްވުމަކީ ކޮންމެހެން ކުރަންޖެހޭ ކަމެއް ކަމަށް ޕެރަމައުންޓުން ދެކެއެވެ.
މި އެއްބަސްވުން ކާމިޔާބުވެއްޖެނަމަ، މިއީ ހޮލީވުޑްގެ ތާރީޚުގައިވެސް ހިނގާ މިފަދަ އެންމެ ބޮޑު މުޢާމަލާތަށް ވެގެންދާނެއެވެ.
