ސައޫދީ އަރަބިއްޔާ ސަރުކާރުގެ ފަރާތުން ދިވެހިރާއްޖެއަށް ހަދިޔާކުރި 15 ޓަނުގެ ކަދުރު، މިއަދު އިސްލާމިކް މިނިސްޓްރީއާ ހަވާލުކޮށްފިއެވެ.

އިސްލާމިކް މިނިސްޓްރީން މައުލޫމާތު ދެއްވި ގޮތުގައި، މިއަދު ހަވާލުކުރި 15 ޓަނުގެ ކަދުރަކީ ސީދާ އެ މިނިސްޓްރީއަށް ހަދިޔާކުރި މިންވަރެކެވެ. މީގެ އިތުރުން، ރާއްޖޭގެ އާންމު ރައްޔިތުންނަށް ބެހުމަށްޓަކައި ސައުދީ ސަރުކާރުން ހަދިޔާކުރާ 50 ޓަނުގެ ކަދުރުގެ ބޮޑު ޝިޕްމަންޓެއް މިހާރު ރާއްޖެއަށް އައުމުގެ މަގުމަތީގައިވާ ކަމަށްވެސް އެ މިނިސްޓްރީން ހާމަކުރެއެވެ.

އިސްލާމީ މިނިސްޓްރީން ވިދާޅުވީ، 50 ޓަނުގެ ކަދުރު ޝިޕްމަންޓް ލިބުމާއެކު، މާލެއާއި އަތޮޅުތަކުގެ ރަށްރަށުގައި އާންމުންނަށް ކަދުރު ބެހުމުގެ މަސައްކަތް ވަރަށް ހަލުވިކަމާއެކު ފެށިގެންދާނެ ކަމަށެވެ. މިއީ ރަމަޟާން މަހާ ދިމާކޮށް ދިވެހި ރައްޔިތުންނަށް ފޯރުކޮށްދޭ އެހީތެރިކަމެކެވެ.

ސައުދީ އަރަބިއްޔާއަކީ ކޮންމެ އަހަރަކުވެސް ރާއްޖެއަށް ދީނީ އަދި އިޖުތިމާއީ ގޮތުން ބޮޑެތި އެހީތަކެއް ފޯރުކޮށްދެމުންދާ ގައުމެކެވެ. އެގޮތުން ކޮންމެ އަހަރަކުވެސް ރާއްޖެއަށް ގިނަ އަދަދަކަށް ކަދުރު ހަދިޔާކުރާއިރު، ނިމިދިޔަ އަހަރުވެސް އެ ގައުމުން ވަނީ 60 ޓަނުގެ ކަދުރު ރާއްޖެއަށް ހަދިޔާކޮށްފައެވެ.

ރާއްޖެއާއި ސައޫދީ އަރަބިއްޔާއާ ދެމެދު އޮންނަ ގާތް ގުޅުމުގެ ތެރެއިން، މި ސަރުކާރުން ދަނީ އިސްލާމީ ގައުމުތަކާއެކު އޮންނަ ގުޅުން އިތުރަށް ބަދަހިކުރަމުންނެވެ.