ނޭޕާލްގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕްގައި މިއަދު ބޫޓާނާއި ރާއްޖެ ކުޅުނު މެޗު ބޫޓާނުން ކާމިޔާބުކޮށްފިއެވެ. އަންފާ ކޮމްޕްލެކްސް ދަނޑުގައި ކުޅުނު މި މެޗު ބޫޓާނުން ކާމިޔާބުކޮށްފައިވަނީ 2-1 ގެ ނަތީޖާއިންނެވެ.
މެޗުގެ ފުރަތަމަ ހާފްގެ 21 ވަނަ މިނެޓުގައި ބޫޓާނަށް ފުރަތަމަ ގޯލު ކާމިޔާބުކޮށްދިނީ މިޑްފީލްޑަރު ޑޯޖީއެވެ. ދެވަނަ ހާފުގެ 50 ވަނަ މިނެޓުގައި ބޫޓާން ކީޕަރު އޭރިއާ ބޭރުން ކުރި ފައުލަކާއި ގުޅިގެން އޭނާއަށް ވަނީ ސީދާ ރަތް ކާޑެއް ދައްކައި ދަނޑުން ފޮނުވާލާފައެވެ. މިއާއެކު ލިބުނު ހިލޭ ޖެހުމެއްގައި ގޯލުގެ ތިރީކަނަށް ފޮނުވާ ރާއްޖެއަށް ނަތީޖާ ހަމަހަމަ ކޮށްދިނީ އިޝާފް ފިރާގެވެ. ބޫޓާނަށް ދެވަނަ ގޯލެއް ޖަހައި މެޗުން މޮޅު ކޮށްދީފައިވަނީ 89 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް ނަވާންގް ޗޯޕެލްއެވެ.
Advertisement
ބޫޓާނާއި ބައްދަލުކުރި މެޗުގައި ރާއްޖެއަށް ހަމައެކަނި ގޯލު ޖަހައިދިން އިޝާފް ފިރާގް
ރާއްޖެ ހިމެނޭ ގްރޫޕް ބީ ގައި ދެން ވާދަކުރަނީ އިންޑިއާ އަދި ބޫޓާނެވެ. މި ގްރޫޕްގެ ފުރަތަމަ މެޗުގައި އިންޑިއާ އަދި ބޫޓާން ބައްދަލުކުރިއިރު އިންޑިއާ ވަނީ 1-0 ކުން ކާމިޔާބުކޮށްފައެވެ. މި ގުރޫޕްގެ ފަހު މެޗުގައި މިމަހު 23 ވަނަ ދުވަހު ބައްދަލުކުރާނީ އިންޑިއާ އަދި ދިވެހިރާއްޖެއެވެ. މިމެޗު ފަށާނީ ރާއްޖެ ގަޑިން 14:15 ގައެވެ.
