އައްޑޫސިޓީ ގަމަށް މިދިޔަ 24 ގަޑިއިރު ތެރޭގައި 167.7 މިލިމީޓަރުގެ ވާރޭ ވެހިފައިވާ ކަމަށް މޫސުމާއި ބެހޭ ގައުމީ އިދާރާއިން ބުނެފިއެވެ.
މެޓް އޮފީހުން ވިދާޅުވީ، އައްޑޫއަށް ކުރަމުން އަންނަ ވިއްސާރާގައި ރޭ އައްޑޫސިޓީ ގަމަށް ބޯކޮށް ވާރޭ ވެހިފައިވާ ކަމަށެވެ. މެޓުން ވިދާޅުވި ގޮތުގައި ފާއިތުވި 24 ގަޑިއިރު ގަމަށް ވަނީ 167.7 މިލިމީޓަރުގެ ވާރޭ ވެހިފައެވެ.
Advertisement
މިއީ މިއަހަރުގެ މިހާތަނަށް އައްޑޫއަށް އެންމެ ބޯކޮށް ވާރޭ ވެހުނު 24 ގަޑިއިރު ކަމަށް ވެސް މެޓުން ވަނީ ވިދާޅުވެފައެވެ. އަދި މުޅި ރާއްޖެއަށް ބަލާއިރު ވެސް މިއަހަރު އެންމެ ބޯކޮށް ވާރޭ ވެހުނު އެއް ސަރަހައްދެވެ. މީގެ ކުރިން މިދިޔަ އަހަރުގެ ޑިސެމްބަރު މަހުގެ 31 ވަނަ ދުވަހު ހުޅުލެއަށް ވަނީ 179 މިލިމީޓަރުގެ ވާރޭ ވެހިފައެވެ.
މެޓް އޮފީހުން ވިދާޅުވީ، މިހާރު ކުރަމުން އަންނަ ވިއްސާރައަކީ ހުޅަނގުގުގައި އުފެދިފައިވާ ސާކިއުލޭޝަނެއްގެ ސަބަބުން އުފެދޭ ވިލާގަނޑުގެ ސަބަބުން ކުރާ ވިއްސާރައެއް ކަމަށާއި މިދުވަސްވަރަކީ ދެ މޫސުން ވެސް ބެދޭ ދުވަސްވަރު ކަމަށެވެ.
ކުރިއަށް އޮތް 24 ގަޑިއިރަށް ބަލާއިރު، މެދު ރާއްޖެ ތެރެެއާއި ދެކުނަށް މެންދުރު ފަހުން ވިއްސާރަ ކުރާނެ ކަމަށް މެޓުން ވަނީ ލަފާކޮށްފައެވެ. އަދި ރާއްޖޭގެ އެންމެ އުތުރުގެ އަތޮޅުތަކަށް ކޮންމެ ވެސް ވަރަކަށް ކެރީގެ އަސަރު ކުރާއިރު، އުތުރުގެ އެހެން އަތޮޅުތަކަށް ކޮންމެ ވެސް ވަރަކަށް ވާރޭ ވެހޭނެ ކަމަށް މެޓުން ވަނީ ލަފާކޮށްފައެވެ.
