ފޯޅަވަހީގެ ސިޔާދަތީ މިލްކުވެރިކަމާ ގުޅޭގޮތުން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން މޮރިޝަސްއަށް ފޮނުވާފައިވާ ސިޓީ އަނބުރާ ގެނައުމަށް މި ސަރުކާރުން ނިންމާފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިހެން ވިދާޅުވީ މި އަހަރުގެ ރިޔާސީ ބަޔާނުގަައި ރާއްޖޭގެ ކަނޑުގެ ސަރަހައްދުން ބައެއް ގެއްލޭ ގޮތަށް ކުރީގެ ސަރުކާރުން ނިންމާފައިވާ ނިންމުންތަކާ ގުޅޭގޮތުން ވާހަކަފުޅު ދައްކަވަމުންނެވެ. މި ސިޓީއަކީ ދިވެހިރާއްޖޭގެ ކަނޑުގެ ސަރަހައްދުން ބައެއް އުނިވާގޮތަށް، ރާއްޖޭގެ މަސްލަހަތަށް އުނިކަން ލިބޭގޮތަށް ފޮނުވާފައިވާ ސިޓީއެއްގެ ގޮތުގައި މި ސަރުކާރުން ސިފަކުރެއެވެ.

ރައީސް ވިދާޅުވީ، ރާއްޖޭގެ ދެކުނު ކަނޑުގެ ސަރަހައްދުން ބޮޑުބައެއް ގެއްލޭ ގޮތަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ނިންމި ނިންމުމަކީ ގަބޫލުކުރެވޭނެ ނިންމުމެއް ނޫން ކަމަށެވެ. އަދި ދިވެހީންގެ އިމުން ޒައްރެއްގެ މިންވަރު ވެސް ދޫކޮށްލުމަކީ ކުރެވިގެންވާނެ ކަމެއް ނޫން ކަމަށް އެމަނިކުފާނު ވިދާޅުވިއެވެ.

ކުރީގެ ސަރުކާރުން 22 އޮގަސްޓު 2022 ގައި މޮރިޝަސްގެ ބޮޑުވަޒީރަށް ފޮނުއްވި ސިޓީގެ ސަބަބުން ރާއްޖޭގެ ސިޔާދަތީ ސަރަހައްދަށް ނޭދެވޭ އަސަރުކޮށްފައިވާ ކަމަށް ބައިނަލްއަގުވާމީ މާހިރުން ލަފާދީފައިވާ ކަމަށް ރައީސް ފާހަގަކުރެއްވި އެވެ.

"ދިވެހިރާއްޖެއިން އެސިޓީ އަނބުރާ ގެނައުމަށް ނިންމިކަން މި ފަހްރުވެރި ދިވެހި ދައުލަތާއި ލޮބުވެތި އެންމެހައި ދިވެހި ރައްޔިތުންގެ ހައްގުގައި، ތިޔަ އިއްޒަތްތެރި މަޖިލިސް މެންބަރުންގެ ކުރިފުޅުމަތީގައި މި ވަގުތު އަޅުގަނޑު އިއުލާނުކުރަން," ރައީސް ވިދާޅުވިއެވެ.

މި މައްސަލަ ދިރާސާކުރުމަށް ބަންޑާރަނައިބު އެކުލަވާލެއްވި ތިން މެންބަރުންގެ ވިލަރެސް ކޮމިޓީން ތައްޔާރުކުރި ރިޕޯޓްތައް މިދިޔަ ޖެނުއަރީ މަހު ވަނީ ރައީސް އޮފީހަށް ހުށަހަޅާފައެވެ. އެ ރިޕޯޓްތަކަށް ބިނާކޮށް، ވަޒީރުންގެ މަޖިލީހުން ވަނީ ކަނޑުގެ ސަރަހައްދު ހޯދުމަށް ގާނޫނީ ގޮތުން އަޅަންޖެހޭ ފިޔަވަޅުތައް އެޅުމަށް ނިންމާފައެވެ.

ރައީސް އިތުރަށް ވިދާޅުވީ، ރާއްޖޭގެ ކަނޑުގެ ސަރަހައްދުތަކާބެހޭ ގާނޫނުގައި ބަޔާންކޮށްފައިވާ އާކިޕެލަޖިކް ބޭސް ޕޮއިންޓްތަކަށް ރިއާޔަތްކޮށް، ގެއްލުނު ސަރަހައްދު ހިމެނޭ ގޮތަށް ރާއްޖޭގެ އީއީޒެޑް ކަނޑައެޅުމަށް ގާނޫނަށް އިސްލާހު ގެނައުމަށް މަޖިލީހަށް ހުށަހަޅުއްވާނެ ކަމަށެވެ. އަދި ރާއްޖޭގެ ކަނޑުގެ ސަރަހައްދުތަކާ ބެހޭ ކަންކަން ދެމެހެއްޓެނިވި ގޮތެއްގައި ބެލެހެއްޓުމަށް ހާއްސަ އޮފީހެއް ގާއިމުކުރައްވާނެ ކަމަށްވެސް އެމަނިކުފާނު ވިދާޅުވި އެވެ.