ދިވެހިރާއްޖޭގެ ޤައުމީ ޔުނިވަސިޓީއިން އިސްނަގައިގެން ކުރިޔަށް ގެންދިޔަ "ތެވެލި އިންޓަރނޭޝަނަލް ކޮންފަރެންސް 2024" ކާމިޔާބުކަމާއެކު ނިންމާލައިފި އެވެ.
ހޯމަ ދުވަހުން ފެށިގެން ދެ ދުވަހުގެ މުއްދަތަކަށް ކުރިޔަށް ގެންދިޔަ މި ކޮންފަރެންސް ނިންމާލުމަށް ފަހު އެމްއެންޔޫގެ ޑީން އޮފް ރިސާޗް ޑރ. މަރިޔަމް ޝަހުނީޒާ ނަސީރު ވިދާޅުވި ގޮތުގައި އެކި ފަންނުތަކާއި ދާއިރާތަކުން 206 ރިސާޗު ޕޭޕަރު ވަނީ ހުށައަޅާފައެވެ. އަދި އޭގެ ތެރެއިން 186 ރިސާޗް ޕޭޕަރު ބަލައިގަންފައި ވާއިރު މިއީ ދުނިޔޭގެ ފެންވަރުގައި ފާހަގަކޮށްލެވޭ ފަދަ ކާމިޔާބީއެއްކަމަށް ޑީން ވަނީ ވިދާޅުވެފައެވެ.
މީގެ ކުރިން ރިސާޗް ޕޭޕަރުތައް ހުށަހެޅީ އެންމެ ހަތް ގައުމު ކަމަށް އަލިއަޅުވާލައްވަމުން ޝަހުނީޒާ ހާމަކުރެއްވި ގޮތުގައި މި އަހަރު 14 ގައުމަކުން ބައިވެރިވެފައިވެއެވެ. އަދި ހުށަހެޅި ބައެއް ރިސާޗުތަކަކީ ފާހަގަކޮށްލެވޭ، މަތީ ފެންވަރުގެ ރިސާޗު ތަކެއްކަން އެކަމަނާ ފާހަގަކުރެއްވިއެވެ.
Advertisement
ތެވެލި ކޮންފަރެންސަކީ ރާއްޖޭގައި އިންތިޒާމްކުރާ އެންމެ ބޮޑު އެއް ކޮންފަރެންސްއެވެ. އެމްއެންޔޫއިން އިސްނަގައިގެން ބާއްވާ ތެވެލި ކޮންފަރެންސްގެ މަގުސަދަކީ ބައިނަލްއަގްވާމީ ދިރާސާވެރިންނަށް ހޯދުންތައް ހުށަހަޅައި، ކުރިއަށް ގެންދާ ދިރާސާތަކާ ގުޅޭ މުހިންމު މައުލޫމާތު ހިއްސާކުރުމުގެ ޕްލެޓްފޯމެއް އެކުލަވާލުމެވެ. މިއީ އެމްއެންޔޫއިން ކާމިޔާބު ކަމާއެކު ތެވެލި ކޮންފެރެންސް ނިންމާލި 7 ވަނަ އަހަރެވެ.
