މި އަހަރުގެ ފަހުކޮޅު އިންޑިއާގައި ބޭއްވުމަށް ހަމަޖެހިފައިވާ ބްރިކްސް ސަމިޓުގައި އެންމެ ބޮޑު އިސްކަމެއް ދޭނީ ގައުމުތަކުގެ ޑިޖިޓަލް ފައިސާ އެކަތި އަނެކައްޗާ ގުޅާލެވޭނެ ޕޭމަންޓް ނިޒާމެއް ގާއިމުކުރުމަށް ކަމަށް އެ އިއްތިހާދުން ހާމަކޮށްފި އެވެ.
މިއީ އާ ފައިސާއެއް އުފެއްދުމުގެ ބަދަލުގައި، އަމަލީ ގޮތުން ބޭނުންކުރެވޭނެ ނިޒާމުތަކަށް އިސްކަންދީގެން ދުނިޔޭގެ މާލީ އޮނިގަނޑަށް ބޮޑު ބަދަލެއް ގެނައުމަށް ބްރިކްސް އިން ކުރާ މަސައްކަތެކެވެ. އިންޑިއާގައި ބާއްވާ ބްރިކްސް ސަމިޓުގެ މައިގަނޑު އެޖެންޑާއަކީ މަރުކަޒީ ބޭންކުތަކުން ނެރޭ ޑިޖިޓަލް ފައިސާ (CBDCs) ބޭނުންކޮށްގެން މުއާމަލާތް ކުރެވޭނެ ބްރިކްސް ޕޭމަންޓް ނިޒާމެއް ގާއިމުކުރުމެވެ. މީގެ މައިގަނޑު މަގްސަދަކީ ޑޮލަރަށް ބަރޯސާވާ 'ސްވިފްޓް' ނިޒާމުގެ ބަދަލުގައި، ގައުމީ ޑިޖިޓަލް ފައިސާތަކުން ސީދާ މުއާމަލާތް ކުރެވޭނެ މަގުތަކެއް ހުޅުވާލުމެވެ.
ބްރިކްސްއިން މިހާރު މަސައްކަތް ކުރަނީ 'ބްރިކްސް ފައިސާ' އުފެއްދުމަކަށް ނޫނެވެ. މީގެ ކުރިން މެމްބަރު ގައުމުތަކަށް އެއް ފައިސާއެއް އުފެއްދުމަށް ކުރި މަސައްކަތްތައް ނާކާމިޔާބުވީ އިންފްލޭޝަން ރޭޓުތައް ތަފާތުވުމާއި، ޗައިނާގެ ޔުއާންގެ ނުފޫޒާ މެދު އޮތް ބިރުވެރިކަމުގެ ސަބަބުންނެވެ. އެހެންކަމުން، މިހާރުގެ އަމާޒަކީ އިންޑިއާގެ ރުޕީ އާއި ޗައިނާގެ ޔުއާން ފަދަ ގައުމީ ފައިސާތައް އެ ގައުމެއްގެ ބާރުގެ ދަށުގައި ބައިތިއްބައިގެން، އެކަތި އަނެކައްޗާ ގުޅާލެވޭނެ ވަސީލަތްތައް ތަރައްގީކުރުމެވެ.
Advertisement
މި އާ ނިޒާމުގެ ސަބަބުން ބޭރުގެ ބޭންކުތަކަށް ބަރޯސާނުވެ، ސީދާ ގައުމީ ފައިސާއިން ބައިނަލްއަގުވާމީ ވިޔަފާރީގެ މުއާމަލާތްތައް އަވަހަށް އަދި ހަރަދު ކުޑަކޮށް ނިންމާލެވޭނެ އެވެ. މީގެ އިތުރުން ހުޅަނގުގެ ގައުމުތަކުން އަޅާ މާލީ ދަތިކުރުމުގެ ފިޔަވަޅުތަކުން ސަލާމަތްވުމަށްވެސް މިއީ ލިބޭނެ ބޮޑު ފުރުސަތެކެވެ. މި ނިޒާމު ބިނާވެފައިވަނީ 'ސެޓްލްމަންޓް ސައިކަލްސް' އާއި 'ފޮރިން އެކްސްޗޭންޖް ސްވޮޕް ލައިންސް' ކިޔާ ދެ އުސޫލެއްގެ މައްޗަށެވެ.
ބްރިކްސް ސަމިޓަކީ ދުނިޔޭގައި އެންމެ ބާރަށް ކުރިއަރަމުން އަންނަ އިގްތިސާދުތައް ކަމަށްވާ ބްރެޒިލް، ރަޝިޔާ، އިންޑިއާ، ޗައިނާ އަދި ސައުތު އެފްރިކާގެ އިތުރުން ދާދިފަހުން ގުޅުނު މިސްރު، އިތިއޯޕިއާ، އީރާން، ސައުދީ އަރަބިއްޔާ، ޔޫ.އޭ.އީ އަދި އިންޑޮނޭޝިއާގެ ވެރިން ބައިނަލްއަގުވާމީ މުހިންމު މައްސަލަތަކާ މެދު މަޝްވަރާކުރަން ބާއްވާ އަހަރީ ބައްދަލުވުމެކެވެ. މި ސިލްސިލާގެ 17 ވަނަ ސަމިޓް 2025 ވަނަ އަހަރުގެ ޖުލައި މަހު ބްރެޒިލްގެ ރިއޯ ޑި ޖެނީރޯގައި ބާއްވާފައިވާއިރު، 2026 ވަނަ އަހަރު ބާއްވާ 18 ވަނަ ސަމިޓް އޮންނާނީ އިންޑިއާގައެވެ.
ބްރިކްސް އަކީ ތަރައްގީވަމުން އަންނަ ބޮޑެތި ގައުމުތައް ގުޅިގެން އުފައްދާފައިވާ ބާރުގަދަ އިއްތިހާދެކެވެ. މި ޖަމާއަތުގެ މައިގަނޑު މަގްސަދަކީ ދުނިޔޭގެ ނިންމުންތަކުގައި "ގްލޯބަލް ސައުތު" ގެ ދައުރު ފުޅާކުރުމާއި، ބައިނަލްއަގުވާމީ ހިންގުމުގެ ނިޒާމަށް ބަދަލުތައް ގެނައުމެވެ. މީގެ އިތުރުން، އަމިއްލަ ފައިސާއިން މުއާމަލާތްކުރުމަށް ހިތްވަރުދީ، ނިއު ޑިވެލޮޕްމަންޓް ބޭންކް މެދުވެރިކޮށް ހުޅަނގުގެ މާލީ ބާރުވެރިކަމަށް ބަދަލެއް ހޯދުމަށް މަސައްކަތް ކުރުމެވެ.
