މި ސަރުކާރުން ތައާރަފުކުރި، ރާއްޖޭގެ ފުރަތަމަ ސަސްޓެއިނަބަލް ޓައުންޝިޕް ތަރައްގީކުރުމުގެ މަޝްރޫއު ކަމަށްވާ "ޕްރޮޖެކްޓް އައިލާ" ގެ އަމަލީ މަސައްކަތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރަސްމީކޮށް ފައްޓަވައިދެއްވައިފި އެވެ.
ނ. އަތޮޅުގެ ދިގުފަރު، ދެކެނަންފަރު އަދި ކުރަމާދޫ ފަޅު ހިމެނޭ ސަރަހައްދުގައި ހިންގާ 790 މިލިއަން އެމެރިކާ ޑޮލަރުގެ މި މަޝްރޫއަކީ، ރާއްޖޭގެ "ސްޕެޝަލް އިކޮނޮމިކް ޒޯން" (އެސްއީޒެޑް)ގައި ހިންގާ ފުރަތަމަ ސަސްޓެއިނަބަލް ޓައުންޝިޕް ޕްރޮޖެކްޓެވެ.
މި މަޝްރޫއުގެ ބިންގާ އެޅުމަށް މިއަދު ބޭއްވި ރަސްމިއްޔާތުގައި މިނިސްޓަރުންނާއި ރައްޔިތުންގެ މަޖިލީހުގެ މެންބަރުން ވެސް ބައިވެރިވެވަޑައިގެންނެވި އެވެ.
އެ ރަސްމިއްޔާތުގައި ވާހަކަދައްކަވަމުން ޕްރޮޖެކްޓް އައިލާގެ ސީއީއޯ ޕީޓާ ކްރިސްޓިޗް ވަނީ ރައީސް ޑރ. މުއިއްޒުގެ ދުރު ވިސްނުންފުޅާއި ލީޑަޝިޕަށް ތައުރީފުކުރައްވާފަ އެވެ. އޭނާ ފާހަގަކުރެއްވި ގޮތުގައި މި ސަސްޓެއިނަބަލް ޓައުންޝިޕް ކޮންސެޕްޓަކީ ރާއްޖޭގެ ތަރައްގީގެ މޮޑެލްއަށް އައި ހަރުދަނާ ބަދަލެކެވެ.
ޕްރޮޖެކްޓް "އައިލާ" ގެ އަމަލީ މަސައްކަތް ފެށުމަށް ބޭއްވި ރަސްމިއްޔާތުގެ ތެރެއިން---ފޮޓޯ:ރައީސް އޮފީސް
ސަސްޓެއިނަބަލް ޓައުންޝިޕަކީ ވަކި ހާއްސަ އިދާރާއަކުން ބަލަހައްޓާ، ގާނޫނީ މިންގަނޑުތަކަށް ފެތޭ ހިދުމަތްތަކާއި ވަސީލަތްތައް ހިމެނޭ ގޮތަށް ތަރައްގީކުރެވޭ ބޮޑެތި ރިއަލް އެސްޓޭޓް ނުވަތަ އިންޓަގްރޭޓެޑް ޓޫރިޒަމް މަޝްރޫއުތަކެވެ. މިފަދަ ސަރަހައްދުތަކަކީ ތިމާވެށްޓަށް ކުރާ ނޭދެވޭ އަސަރުތައް ކުޑަކުރުމަށް އިސްކަންދީގެން، ދެމެހެއްޓެނިވި އިންފްރާސްޓްރަކްޗާގެ އެހީގައި މީހުން ދިރިއުޅުމަށް ބޭނުންވާ އަސާސީ ހިދުމަތްތަކާއި އާންމު ވަސީލަތްތައް ފުރިހަމައަށް ގާއިމުކޮށްފައިވާ ތަންތަނެވެ.
މިއީ ރާއްޖޭގައި ހިންގާ މިފަދަ ފުރަތަމަ މަޝްރޫއެވެ. 2028 ވަނަ އަހަރަށް ނިންމާގޮތަށް ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްގެން ހިންގާ މި މަޝްރޫއުގައި ލަގްޒަރީ ރެސިޑެންސްތަކާއި، މެރީނާއަކާއެކު ތަރައްގީކުރާ އަލްޓްރާ ލަގްޒަރީ ރިސޯޓެއްގެ އިތުރުން، ބައިނަލްއަގުވާމީ ފެންވަރުގެ ސިއްހީ ހިދުމަތްދޭ މަރުކަޒަކާއި ހޮސްޕިޓާލިޓީ އެންޑް ލީޑަޝިޕް ދަސްކޮށްދޭ ދުނިޔޭގެ ފެންވަރުގެ ސްކޫލެއް ހިމެނެ އެވެ. މި ތަން ހިންގުމުގައި މަދުވެގެން 60 އިންސައްތަ އިއާދަކުރަނިވި ހަކަތަ ބޭނުންކުރާއިރު، ދެމެހެއްޓެނިވި އެކުއަކަލްޗާ އަދި ދަނޑުވެރިކަމުގެ ނިޒާމުތައް ވެސް މި މަޝްރޫއުގައި ހިމެނެ އެވެ.
މިއަދު ރަސްމިއްޔާތުގައި ވާހަކަ ދައްކަވަމުން އިކޮނޮމިކް މިނިސްޓަރު މުހައްމަދު ސައީދުވިދާޅުވީ އައިލާ ފަދަ މަޝްރޫއުތަކުގެ ސަބަބުން، ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ މަންޒިލެއްގެ ބަދަލުގައި، ދިރިއުޅުމަށާއި އިންވެސްޓްކުރުމަށް އަދި ދިގުމުއްދަތުގެ މަންފާ ހޯދުމަށް އެކަށީގެންވާ ތަނަކަށް ވެގެންދާނެ ކަމަށެވެ.
މިއަދުގެ ރަސްމިއްޔާތުގައި އިކޮނޮމިކް މިނިސްޓަރާއި، ކޮންސްޓްރަކްޝަން މިނިސްޓަރުގެ އިތުރުން ޕްރޮޖެކްޓް އައިލާ، ކްރިސްޓަލް ހޯލްޑިންގްސް އަދި ބްލޫ ރޮކްގެ މަންދޫބުން ބައިވެރިވެވަޑައިގެންނެވި އެވެ.
ރަސްމިއްޔާތަށްފަހު، ރައީސުލްޖުމްހޫރިއްޔާ ވަނީ މަޝްރޫއު ކުރިއަށްދާ ސަރަހައްދު ބައްލަވާލައްވާފަ އެވެ. މި މަޝްރޫއަކީ ކްރިސްޓަލް ހޯލްޑިންގްސް ޕްރައިވެޓް ލިމިޓެޑާއި ބޯޑް އޮފް އިންވެސްޓްމަންޓާ ދެމެދު ވެވުނު އިންވެސްޓްމަންޓް އެއްބަސްވުމެއްގެ ދަށުން ކުރިއަށްގެންދާ މަސައްކަތެކެވެ.
