ރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް) ތަކުގައި ހިންގިދާނެ އިގްތިސާދީ މަސައްކަތްތަކާއި، އެފަދަ ޒޯނެއްގައި ހިމެނޭ އިންވެސްޓްމަންޓްތަކުގެ އެންމެ ކުޑަ މިންގަނޑު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަލުން ކަނޑައަޅުއްވައިފި އެވެ.
މިކަން އިއުލާނުކުރައްވާފައިވަނީ މިއަދު ސަރުކާރުގެ ގެޒެޓުގައި ޝާއިއުކުރެއްވި ނަންބަރު 1/2026 ގަރާރުންނެވެ. އެސްއީޒެޑް ގާނޫނުގެ 22 ވަނަ މާއްދާގެ ދަށުން، ބޯޑް އޮފް އިންވެސްޓްމަންޓްސްގެ މަޝްވަރާއާއެކު، ކޮންމެ އަހަރަކު އެއްފަހަރު މި މިންގަނޑުތައް މުރާޖައާކޮށް ރައީސް އިއުލާނު ކުރައްވަން ޖެހެއެވެ.
މިއަދު އާންމުކުރި ގަރާރުގައިވާ ގޮތުން، އެސްއީޒެޑްގައި ހިންގިދާނެ އިގްތިސާދީ މަސައްކަތްތައް ދެ ބަޔަކަށް ވަނީ ބަހާލާފަ އެވެ. އެއީ 100 މިލިއަން އެމެރިކާ ޑޮލަރަށްވުރެ ކުޑަނޫން އިންވެސްޓްމަންޓްތަކާއި، 500 މިލިއަން އެމެރިކާ ޑޮލަރަށްވުރެ ކުޑަނޫން އިންވެސްޓްމަންޓް ހިމެނޭ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތަކެވެ.
Advertisement
100 މިލިއަން ޑޮލަރުގެ އިންވެސްޓްމަންޓްތަކުގެ ތެރޭގައި ހިމެނޭ މައިގަނޑު 9 ދާއިރާއަކީ:
- އެކްސްޕޯޓަށް އިސްކަންދީގެން ހިންގާ މެނުފެކްޗަރިންގ މަސައްކަތްތައް.
- ޓްރާންސްޝިޕްމަންޓް ޕޯޓް، ލޮޖިސްޓިކްސް، ބަންކަރިން އަދި އެއާޕޯޓް ފަދަ ހިދުމަތްތައް.
- ޔުނިވާސިޓީ، ޓާޝަރީ ހޮސްޕިޓަލް އަދި ދުނިޔޭގެ ފެންވަރުގެ ރިސާޗް ފެސިލިޓީތައް.
- އިންފޮމޭޝަން ކޮމިއުނިކޭޝަން ޓެކްނޮލޮޖީ (އައިސީޓީ) ޕާކުތައް.
- އިންޓަނޭޝަނަލް ފައިނޭންޝަލް ސާވިސަސް އަދި ޓްރޭޑް ސެންޓަރުތައް.
- އިއާދަކުރަނިވި ހަކަތައިގެ ދާއިރާ.
- ރާއްޖެއަށް އާ ޓެކްނޮލޮޖީ ތައާރަފުކުރުމުގެ މަސައްކަތްތައް.
- ފުޑް ސެކިއުރިޓީގެ ދާއިރާ.
- ތެލާއި، ގޭހާއި، މިނަރަލް އެކްސްޕްލޮރޭޝަންގެ މަސައްކަތްތައް.
މީގެ އިތުރުން، 500 މިލިއަން ޑޮލަރުގެ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތަކުގައި، އެ އަދަދު ހާއްސަކުރަންވާނީ ސީދާ ޓައުންޝިޕް ތަރައްގީކުރުމުގެ ކޮމްޕޯނަންޓްތަކަށް ކަމަށްވެސް ރައީސްގެ ގަރާރުގައި ކަނޑައަޅުއްވާފައިވެ އެވެ.
މި ނިންމެވުމަކީ މިދިޔަ އަހަރުގެ ޖަނަވަރީ މަހު ނެރުއްވި ގަރާރު މުރާޖައާ ކުރެއްވުމަށްފަހު، ރާއްޖޭގެ އިގްތިސާދު ސިންދަފާތުކޮށް ބޮޑެތި އިންވެސްޓްމަންޓްތަކަށް ފުރުސަތު ހުޅުވާލުމުގެ ގޮތުން ނިންމެވި ނިންމެވުމެއް ކަމަށް ރައީސް އޮފީހުން ހާމަކުރި އެވެ.
