ޓޮޓެންހަމް މެޗު އެއްވަރު، ފުރަތަމަ ހަފްތާ ނިމުނުއިރު އެއްވަނާގައި ބްރައިޓަން

ޕްރިމިއާ ލީގުގެ މި ހަފްތާގެ ފަހު މެޗުގައި މިރޭ ލެސްޓާ ސިޓީ އަދި ޓޮޓެންހަމް ކުޅުނު މެޗު 1-1 އިން އެއްވަރުވެއްޖެ އެވެ.

ކިންގް ޕަވާ ސްޓޭޑިއަމްގައި ކުޅުނު މިމެޗުގެ ލީޑު ނަގާފައިވަނީ ޓޮޓެންހަމުންނެވެ. މެޗުގެ 29 ވަނަ މިނެޓުގައި އެޓީމަށް މި ލަނޑު ކާމިޔާބުކޮށްދީފައިވަނީ ޑިފެންޑަރު ޕެޑްރޯ ޕޮއްރޯއެވެ.

މެޗުގެ 57 ވަނަ މިނެޓުގައި ލެސްޓާ ސިޓީއަށް ނަތީޖާ ހަމަހަމަ ކޮށްދިނީ 37 އަހަރުގެ ފޯވާޑް ޖޭމީ ވާޑީއެވެ. މެޗުގައި ލެސްޓާއަށް ވަނީ ލީޑު ނަގަން ރަނގަޅު ފުރުސަތުތަކެއް ލިބި ބޭކާރުވެފައެވެ. އެގޮތުން ފާހަގަ ކޮށްލެވެނީ ފަހު ހާފުގައި ވާޑީ ފޮނުވާލި ހަމަލާއެއް ޓޮޓެންހަމްގެ ކީޕަރު ވިކާރިއޯ ވަނީ ހުށިޔާރުކަމާއެކު މަތަކޮށްފައެވެ.

ޕްރިމިއާ ލީގުގެ މިހަފުތާގެ މެޗުތައް މިރޭ ނިމިފައިވާއިރު ތާވަލުގެ އެއްވަނާގައި 3 ޕޮއިންޓާއިއެކު މިވަގުތު އޮތީ ބްރައިޓަން އެވެ. ބްރައިޓަން އެއްވަނާގައި އޮތީ ގޯލުގެ ތަފާތުންނެވެ.

ލީގުގެ ދެވަނަ ހަފްތާގެ ފުރަތަމަ މެޗުގައި ހޮނިހިރު ދުވަހު ހަވީރު ބްރައިޓަން ނުކުންނާނީ މެންޗެސްޓަރ ޔުނައިޓެޑާއި ދެކޮޅަށެވެ.