މާލޭގެ އެޕާޓްމެންޓެއް ކުއްޔަށް ދޭނެކަމަށް ބުނެ ތިން މީހެއްގެ އަތުން 350،000 ރުފިޔާ އެޑްވާންސް ފައިސާގެ ގޮތުގައި ހޯދި ކ.މާލެ، މއ. ބުލާޝަމްގެ އަބްދުﷲ ހުޝާމް، އެއް އަހަރާއި ހަތް މަހާއި ހަ ދުވަހަށް ޖަލަށް ލުމަށް ކުރިމިނަލް ކޯޓުން ހުކުމްކޮށްފިއެވެ.
މި މައްސަލާގައި ޖަލު ހުކުމާއެކު ދައުވާގައި ވަނީ 115،200 ރުފިޔާއިން ޖޫރިމަނާކޮށް، ހުކުމްކުރި ދުވަހުން ފެށިގެން ހަ މަސްދުވަހުގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އަށް އެ ފައިސާ ދައްކައި ޚަލާސް ކުރުމަށް އަމުރުކޮށްފައެވެ.
މި މައްސަލައިގެ ދައުވާގައި ވަނީ ހުޝާމް، 2015 ވަނަ އަހަރުގެ ފަހުކޮޅު އެ ގޭގެ ދެވަނަ ފަންގިފިލާގެ ދެވަނަ އެޕާޓްމެންޓު، 200،000 ރުފިޔާއަށް 7 އަހަރު ދުވަހުގެ މުއްދަތަކަށް ކުއްޔަށް ދޭނެކަމަށް ބުނެ އެޑްވާންސް ފައިސާގެ ގޮތުގައި 100،000 ރުފިޔާ އަތުލުމަށްފަހު އެޕާޓުމެންޓު ކުއްޔަށް ނުދޭކަމަށެވެ. އަދި އޭގެ 10 ދުވަސް ފަހުން ހަމަ އެ އެޕާޓުމެންޓު، 7 އަހަރު ދުވަހުގެ މުއްދަތަށް އެހެން މީހަކަށް 350،000 ރުފިޔާއަށް ކުއްޔަށް ދިނުމަށް އެއްބަސްވެ، އެޑްވާންސްގެ ގޮތުގައި 150،000 ރުފިޔާ ނަގައި، ތިންވަނަ މީހެއްގެ އަތުންވެސް އެޑްވާންސް ގޮތުގައި 100،000 ރުފިޔާއަށްވާ 6،485 ޑޮލަރު ނަގާފައިވާ ކަމަށް މައްސަލައިގައިވެއެވެ.
Advertisement
މއ. ބުލާޝަމްގޭގެ އެޕާޓުމެންޓު ކުއްޔަށް ދޭނެކަމަށް ބުނެ، މަކަރާ ހީލަތުން، ތިން މީހެއްގެ އަތުން ޖުމްލަ 350،000 ރުފިޔާ ނަގާފައި ވުމުން ހުޝާމްގެ މައްޗަށް ކޮށްފައިވަނީ ޓެކުމުގެ ދައުވާއެވެ.
މި މައްސަލައިގައި އެޑްވާންސަށް ފައިސާދިން ތިން މީހުން ވެސް ޝަރީއަތުގެ މަޖިލީހުގައި ހެކިބަސްދިން އިރު، އެއީ ޓެކުމުގެ ނިޔަތުގައި ކުރި ކަމެއް ނޫން ކަމަށް ޝަރީއަތުގައި ހުޝާމްވަނީ އޭނާގެ މައްޗަށް އުފުލި ދައުވާއަށް އިންކާރުކޮށްފައެވެ. ނަމަވެސް ދިފާއުގައި އޭނާގެ ފަރާތުން އެއްވެސް ހެއްކެއް ހުށަހަޅާފައެއް ނުވެއެވެ.
މި ކުށަކީ ޖިނާޔަތުގެ ހަތަރުވަނަ ދަރަޖައިގެ ކުށެއް ކަމުން، އެ ކުށަށް ކަނޑައަޅާފައިވަނީ އެއް އަހަރާއި ހަތް މަހާއި ހަ ދުވަހުގެ ޖަލު އަދަބެކެވެ. ނަމަވެސް ހުޝާމްއަކީ އާއިލީ ޒިންމާ އަދާކުރާ މީހަކަށްވާތީއާއި، މައްސަލައިގައި ހިމެނޭ ފަރާތްތަކަށް ފައިސާ ދީފައިވާ މީހެއް ކަމަށްވާތީ، ޖޫރިމަނާ އަދަބެއް ކަނޑައަޅައިދިނުމަށް އޭނާވަނީ ޝަރީއަތުގައި އެދިފައެވެ.
މި މައްސަލައިގައި ހުޝާމްގެ މައްޗަށް ކްރިމިނަލް ކޯޓުން ހުކުމްކުރީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ. އަދި 115،200 ރުފިޔާއިން އޭނާ ޖޫރިމަނާކޮށް، ހުކުމްކުރި ދުވަހުން ފެށިގެން ހަ މަސްދުވަހުގެ ތެރޭގައި މޯލްޑީވްސް އިންލެންޑް ރެވެނިއު އޮތޯރިޓީ (މީރާ)އަށް އެ ފައިސާ ދައްކައި ޚަލާސް ކުރުމަށް ވަނީ އަމުރުކޮށްފައެވެ.
އޮޅުވާލައިގެން ފައިސާ ހޯދުން ރާއްޖޭގައި އާއްމުވެފައި ވާއިރު، އޮންލައިން އިންވެސްޓުމެންޓުގެ ނަމުގައާއި، އެކިއެކި އެއްބަސްވުންތަކުގެ މުއާމަލާތްތަކުގައި ވެސް އޮޅުވާލައިގެން ފައިސާ ހޯދައެވެ.
