ނިމިދިޔަ ޖުލައި މަސް ނިމިގެން ދިޔައިރު ބޭނުންކުރެވޭ ރިޒާވްގައި 45 މިލިއަން ޑޮލަރު ހުރި ނަމަވެސް، މާލީ ހާލަތު ރަނގަޅުކުރުމަށް ކުރަމުންދާ މަސައްކަތާއެކު މި ހިނގާ އޮގަސްޓު މަހު ރިޒާވް ރަނގަޅުވާނެ ކަމަށް އެމްއެމްއޭއިން ލަފާކޮށްފިއެވެ.
އެމްއެމްއޭއިން ދައުލަތުގެ ރިޒާވާއި ބެހޭގޮތުން މައުލޫމާތު ހިއްސާކުރަމުން ބުނެފައިވަނީ، ކޯވިޑް 19 ގެ ސަބަބުން ކުރިމަތިވި އިގްތިސާދީ ގޮންޖެހުންތަކާ ގުޅިގެން އެމްއެމްއޭ އާއި ފިނޭންސް މިނިސްޓްރީއާއެކު 2019 ވަނަ އަހަރު ވެފައިވާ އެއްބަސްވުމެއްގެ ދަށުން ސޮވެރިން ޑިވެލޮޕްމެންޓް ފަންޑު (އެސްޑީއެފް) އަށް ޖަމާކުރެވޭ ޑޮލަރު އެމްއެމްއޭ އަށް މާރުކުރުމަށް ފަހު، ބޭނުންކުރެވޭ ރިޒާވްގައި ހިމަނާފައިވާ ކަމަށެވެ.
ނަމަވެސް 2023 ވަނަ އަހަރުގެ ޑިސެމްބަރު މަހުން ފެށިގެން ސޮވެރިން ޑިވެލޮޕްމެންޓް ފަންޑަށް ޖަމާވާ ބޭރު ފައިސާ އެމްއެމްއޭއަށް މާރުކުރުމުގެ ބަދަލުގައި ޑޮލަރު ބެހެއްޓުމަށް ނިންމާފައިވާ ކަމަށް އެމްއެމްއޭއިން ވަނީ ފާހަގަކޮށްފައެވެ.
Advertisement
އެސްޑީއެފްގައި ބޭނުންކުރެވެން 65 މިލިއަން ޑޮލަރު މިވަގުތު ހުރިއިރު، މި އަހަރުގެ ޖުލައި މަހު ޖުމްލަ ބޭނުންކުރެވޭ ރިޒާވްގައި ހުރީ 45 މިލިއަން ޑޮލަރު ކަމަށާއި، ބޭނުންކުރެވޭ ރިޒާވްގައި ހުރި އަދަދުގައި އެސްޑީއެފްގައި ހުރި އަދަދު ނުހިމެނޭ ކަމަށް ވެސް އެ އިދާރާއިން ވަނީ ބުނެފައެވެ. ހަމަ އެއާއެކު އެސްޑީއެފަށް ޖަމާކުރެވޭ ބޭރު ފައިސާގެ އަދަދު އިތުރުކުރުމަށް ސަރުކާރުން އަޅަން ނިންމާފައިވާ ފިޔަވަޅުތަކުގެ ސަބަބުން ކުރިން ލަފާކުރި އަދަދަށް ވުރެއއ އިތުރުވާނެ ކަމަށްވެސް އެމްއެމްއޭއިން ވަނީ ހާމަކޮށްފައެވެ.
އެމްއެމްއޭ އިން އިތުރަށް ބުނެފައިވަނީ، ރާއްޖޭގެ ޓޫރިޒަމާއި ގުޅިފައިވާ އިންޑަސްޓްރީތަކުން މިއަހަރުގެ ބާކީ އޮތް ދުވަސްތަކުގައި ކުރިން ލަފާކުރި ގޮތާއި ހިލާފަށް، އިތުރު ކުރިއެރުންތަކެއް ލިބޭނެ ކަމަށް އަންދާޒާ ކުރެވޭތީ، އޭގެ ހެޔޮ ބަދަލު ރިޒާވުން ފެންނަން ފަށާނެ ކަމަށެވެ. އަދި މީގެ އިތުރުން ސަރުކާރާއި ސަރުކާރު ހިއްސާވާ ކުންފުނިތަކުގެ ބޭރު ފައިސާގެ މުއާމަލާތްތަކަށް ބޭނުންވާ ފައިނޭންސް، ބޭރުގެ އެކިއެކި ފަރާތްތަކުން ހޯދުމުގެ މަސައްކަތްތައް ކުރަމުންދާ ކަމަށް އެ އިދާރާއިން ހާމަކުރެއެވެ.
ބޭނުންކުރެވޭ ރިޒާވާ ބެހޭ ގޮތުން އެމްއެމްއޭ އިން ވާހަކަ ދައްކާފައި މިވަނީ، އެ ރިޒާވް މި މަސްތެރޭގައި ހުސްވާނެ ކަމަށް ލަފާކޮށް އެމްއެމްއޭއިން ފިނޭންސް މިނިސްޓްރީއަށް ފޮނުވި ކަމަށް ބުނާ ސިޓީއެއް މީޑިއާގައި އާންމުވެފައިވާ ދަނޑިވަޅެއްގައެވެ.
ބޭނުން ކުރެވޭ ރިޒާވް 17.6 މިލިއަން ޑޮލަރަށް މިދިޔަ މަހު ދަށްވާނެ ކަމަށް އެމްއެމްއޭގެ ސިޓީއާ ހަވާލާދީ މީޑިއާތަކުގައި ހާމަކޮށްފައިވާ ނަމަވެސް، ލިބިފައިވާ މައުލޫމާތުތަކަށް ބިނާކޮށް އަންދާޒާ ކުރެވޭ ގޮތުގައި އޮގަސްޓް މަހު ރިޒާވްގެ ހާލަތު ރަނގަޅުވާނެ ކަމަށް ގަބޫލުކުރެވޭ ކަމަށް އެމްއެމްއޭއިން ވަނީ ހާމަކޮށްފައެވެ.
