4-1 އިން ފަހަތުން އަރައި އަލް ނަސްރު ބަލިކޮށް އަލް ހިލާލްއިން ސައުދީ ސުޕަ ކަޕްގެ ޗެމްޕިއަންކަން ހޯދައިފިއެވެ.
ޕްރިންސް ސުލްތާން ބިން އަބްދުލްއަޒީޒް ސްޓޭޑިއަމްގައި ކުޅެވުނު ފޯރި ގަދަ ފައިނަލް މެޗް އަލް ހިލާލް އިން ކާމިޔާބު ކޮށްފައިވަނީ 4-1 ގެ ނަތީޖާއަކުންނެވެ.
މެޗުގެ ފުރަތަމަ ގޯލު ޖަހައި ލީޑު ނަގާފައިވަނީ އަލް ނަސްރުންނެވެ. ފުރަތަމަ ހާފް ނިމެން އުޅެނިކޮށް މި ލަނޑު އެޓީމަށް ކާމިޔާބު ކޮށްދީފައިވަނީ ޕޯޗުގަލްގެ ތަރި ކްރިސްޓިއާނޯ ރޮނާލްޑޯއެވެ. މެޗުގެ ފުރަތަމަ ހާފް ނިމިގެން ދިޔައީ 1-0 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.
Advertisement
މެޗުގެ ދެވަނަ ހާފްގައި އަލް ހިލާލްއިން ވަނީ އެޓީމްގެ ކުޅުން ރަނގަޅުކޮށްފައެވެ. އެގޮތުން މެޗުގެ 55 ވަނަ މިނުޓުގައި މިލިންކޮވިޗް ސެވިޗްވަނީ ލަނޑެއްޖަހައި ނަތީޖާ ހަމަހަމަކޮށްފައެވެ. އަލް ހިލާލްއަށް މެޗުގައި ލީޑު ނަގައިދީފައިވަނީ 63 ވަނަ މިނުޓުގައި އެޓީމުގެ ފޯވާޑް މިޓްރޮވިޗްއެވެ. އޭގެ ފަހުން 69 ވަނަ މިނުޓުގައި މިޓްރޮވިޗްވަނީ އިތުރު ލަނޑެއް ކާމިޔާބުކޮށް ލީޑު ފުޅާކޮށްފައެވެ. އަލްހިލާލްގެ ފަހު ލަނޑު އޭގެ ތިންމިނުޓް ފަހުން 72 ވަނަ މިނުޓުގައި އެޓީމަށް ކާމިޔާބު ކޮށްދިނީ ބްރެޒިލްގެ ފޯވާޑް މަލްކޮމްއެވެ.
މި މޮޅާއެކު އަލް ހިލާލްއިންވަނީ ސައުދީ ސުޕަ ކަޕްގެ ޗެމްޕިއަންކަން 4 ފަހަރު ހޯދާފައެވެ. މިއީ މިމުބާރާތް އެންމެ ގިނައިން ކާމިޔާބު ކޮށްފައިވާ ޓީމެވެ.
