މަސްތުވާތަކެތީގެ އުމުރުދުވަހުގެ ޖަލު ހުކުމެއް އަންނަ މައްސަލައެއްގައި ލ.ގަމުތުނޑިން ދެ މީހަކު ހައްޔަރުކޮށްފި

މަސްތުވާތަކެތީގެ އުމުރުދުވަހުގެ ޖަލު ހުކުމެއް އަންނަ މައްސަލައެއްގައި ލ.ގަމުތުނޑިން ދެ ދިވެހިން ހައްޔަރުކޮށްފިއެވެ،

ފުލުހުންނަށް ލިބުނު މައުލޫމާތަކާއި ގުޅިގެން ހުކުރު ދުވަހު ގަމުތުނޑީގެ ގެއެއް ބަލައި ފާސްކުރުމުގެ ތެރޭގައި އެ ގެއިން ވަނީ މަސްތުވާތަކެއްޗާއި ބެހޭ ގާނޫނުން އުމުރު ދުވަހުގެ ޖަލލު ހުކުމެއް އަންނަ މިންވަރަށް މަސްތުވާތަކެތީގެ ބާވަތެއް ކަމަށްވާ ހެރޮއިން ފެނިފައެވެ.

ފުލުހުން ބުނީ ފެނުނު ހެރޮއިންގެ ބަރުދަނަކީ 24.42 ގުރާމެވެ. މީގެ އިތުރުން ފަސް ލީޓަރުގެ ދިޔާއެއްޗެއް އަޅާފައިހުރި ފުޅިއެއް ފެނުނު ކަމަށާއި އެތަކެއްޗަކީ ބަނގުރާ ކަމަށް ޝައްކު ކުރެވޭ ކަމަށްވެސް ފުލުހުން ބުންޏެވެ.

ކޯޓު އަމުރުގެ ދަށުން ބަލައިފާސްކޮށް މިތަކެތި އަތުލައިގަތްއިރު، މިމައްސަލައިގައި ހައްޔަރު ކޮށްފައިވަނީ ، އުމުރުން 42 އަހަރާއި 57 އަހަރުގެ ދެ ފިރިހެނުންނެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.