މޫސުން ގޯސްވުމުގެ ސަބަބުން މާލެ ސިޓީގައި ހުރި ގެތަކަށް ލިބުނު ގެއްލުމުގެ އެސެސްމަންޓް ހަދަން ފަށާފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.
އެ އޮތޯރިޓީން ހާމަކުރި ގޮތުގައި ވިއްސާރައިގަ އަސަރުކުރި ރަށްތަކުގެ އެސެސްމަންޓުތައް ހަދަނީ، އެ ރަށްރަށުގެ ކައުންސިލްތަކާ ގުޅިގެންނެވެ. އަދި އޮގަސްޓް މަހުގެ 13 ވަނަ ދުވަހު ބޯކޮށް ވާރޭވެހުމުގެ ސަބަބުން އަސަރުކުރި ގެތައް މޮނިޓަރކޮށް، އެ ގޭގެއަށް ޒިޔާރަތް ކުރުމަށް 11 ޓީމެއް ހަރަކާތްތެރިވާނެ ކަމަށް ވެސް އެންޑީއެމްއޭއިން ބުނެއެވެ.
އެސެސްމަންޓަށް ފަހު މޫސުމުގެ އަސަރު ކުރި ގެތަކަށް މާލީ އެހީތެރިކަން ފޯރުކޮށްދިނުމަށް ހަމަޖެހިފައިވަނީ ސަރުކާރުން ކަނޑައަޅާފައިވާ ރީފިލް ގައިޑްލައިންގެ ދަށުން ކަމަށް އެންޑީއެމްއޭއިން ވަނީ ހާމަކޮށްފައެވެ. އެންޑީއެމްއޭއިން ކަށަވަރުކޮށްދީފައިވާ ގޮތުގައި އެސެސްމަންޓް ވީ އެންމެ އަވަހަށް ނިންމުމަށް ދަނީ މަސައްކަތް ކުރެވެމުންނެވެ.
Advertisement
އޮގަސްޓް މަހުގެ 13 ވަނަ ދުވަހު ކުރި ވިއްސާރައިގައި މާލޭގެ ބޮޑު ބައެއްވެސް ވަނީ ފެންބޮޑުވެފައެވެ. ރާއްޖެއަށް ދެ ގަޑިއިރު ވަންދެން 45 މިލިމީޓަރުގެ ވާރޭ ވެހި ފެންބޮޑުވިއިރު، މޫސޫމާއި ބެހޭ ގައުމީ އިދާރާ (މެޓް އޮފީސް) އިން ރިޕޯޓްކޮށްފައިވާ ގޮތުގައި އޮގަސްޓް މަހުގެ 13 ވަނަ ދުވަހު އެކަނިވެސް 80 މިލިމީޓަރުގެ ވާރޭ ވެހިފައިވެއެވެ. މޫސުމާބެހޭ މާހިރު ހުސައިން ވަހީދު ވިދާޅުވި ގޮތުގައި ވިއްސާރައިގައި ޖެހިޖެހިގެން ތިން ގަޑިއިރާއި ބައި ދެމިގެން ގޮސްފައިވެއެވެ.
އެހެން އަހަރުތަކާ އަޅާބަލާއިރު، ހުޅަނގު ދެކުނު މޫސުމުގައި މިއަހަރު އިތުރަށް ވާރޭ ވެހޭނެ ކަމަށް މެޓް އޮފީހުން ލަފާކުރެ އެވެ. ޑިސެމްބަރު މަހުގެ ނިޔަލަށް މި ސީޒަން ދެމިގެންދާނެކަން ފާހަގަކުރައްވައި، ވިއްސާރަ މޫސުމަށް މެޓް އޮފީހުން ރަނގަޅަށް ތައްޔާރުވެފައިވާކަން ހުސައިން ވަހީދު ހާމަކުރެއްވިއެވެ.
