އުތުރާއި މެދު ރާއްޖެތެރެއަށް ނެރެފައިވާ ރީނދޫ އެލާޓުގެ މުއްދަތު އިތުރުކޮށްފި

އުތުރާއި މެދު ރާއްޖެތެރެއަށް ނެރެފައިވާ ރީނދޫ އެލާޓުގެ މުއްދަތު މޫސުމާއި ބެހޭ ގައުމީ އިދާރާއިން އިތުރުކޮށްފިއެވެ. މިއަދު މެންދުރު 14:00 އާ ހަމައަށް ހއ. އަތޮޅުން ތ.އަތޮޅާއި ހަމައަށް ނެރެފައިވާ ރީނދޫ އެލާޓު މިރޭގެ 20:00 އާއި ހަމައަށް ވަނީ އިތުރުކޮށްފައެވެ.

މި މުއްދަތުގެ ތެރޭގައި 25 މޭލާއި 30 މޭލާ ދެމެދުގެ ބާރުމިނުގައި ވައިޖެހި، ގަޑިއަކު 50 މޭލު ބާރުމިނުގައި ވައިޖެހޭނެ ކަމަށާއި މި ސަރަހައްދުތަކަށް ކަނޑުތައް ގަދަވާނެ ކަމަށް މެޓް އޮފީހުން ލަފާކޮށްފައިވެއެވެ.

މޫސުމާ ބެހޭ އިދާރާއިން ވަނީ ވައިގަދަ ވަގުތުތަކުގައި ބިޔަ ރާޅު ނަގާނެ ކަމުގެ އިންޒާރު ދީފައެވެ.

މިހާރުން ފެށިގެން އާންމުންނަށް ސަމާލުވެ، މުދަލާއި ތަކެތި ރައްކާތެރިކުރުމަށް، ރައްކާތެރިކަމުގެ ފިޔަވަޅުތައް އެޅުމަށް މެޓު އޮފީހުން ވަނީ ނަސޭހަތްތެރިވެފައެވެ.

މެޓް އޮފީހުން ހާމަކުރާ ގޮތުގައި މި ހަފްތާގެ ބާކީ އޮތްބައި މުޅި ރާއްޖެއަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާކުރެވެއެވެ. މެޓް އޮފީހުން ވަނީ އާދީއްތަ ދުވަހުން ފެށިގެން ދެކުނުގެ އަތޮޅުތަކަށް އަދި ހޯމަ ދުވަހުން ފެށިގެން އުތުރާއި މެދުތެރޭގެ އަތޮޅުތަކަށް މޫސުން ރަނގަޅުވާނެ ކަމަށް ލަފާކޮށްފައެވެ.