ޕްރޮޖެކްޓް ފޯ ހިއުމަން ރިސޯސް ޑިވެލޮޕްމަންޓްގެ އެއްބަސްވުމުގައި ސޮއިކުރެއްވީ މިނިސްޓަރ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރިޔަމް މަރްޔާ އާއި ރާއްޖޭގައި ހުންނަ ޖަޕާނުގެ ސަފީރު ޑރ. ޓަކެޗި މިޑޮރީއެވެ.
ޖަޕާނު ގްރާންޓް އެއިޑް (ޖޭޑީއެސް) އިން ކުރިއަށް ގެންދާ ޕްރޮޖެކްޓް ފޯ ހިއުމަން ރިސޯސް ޑިވެލޮޕްމަންޓް ސްކޮލަޝިޕްގެ ދަށުން ރާއްޖޭގެ 24 ސިވިލް ސާވަންޓުންނަށް، ޖަޕާނުގެ ޔުނިވާސިޓީތަކުން މާސްޓާސް ކިޔެވުމުގެ ފުރުސަތު ލިބިގެންދާނެއެވެ. މާސްޓާސް ޕްރޮގްރާމްތަކަކީ އެއް އަހަރާއި ދެ އަހަރާ ދެމެދުގެ މުއްދަތެއްގެ ތެރޭގައި ކުރިއަށް ގެންދެވޭނެ ޕްރޮގްރާމްއަކަށް ވާންޖެހޭނެއެވެ. އަދި ކުރިއަށްގެންދާ ޕްރޮގްރާމްތަކުގެ ހަރަދުތައް ޖަޕާނު ސަރުކާރުން ހަމަޖައްސައިދޭނެ ކަމަށް ވެސް ވިދާޅުވިއެވެ. އެ އެއްބަސްވުމުގެ ދަށުން ވޭތުވެދިޔަ ހަތަރު އަހަރުގެ ތެރޭގައި 24 ސްކޮލަޝިޕް ފުރުސަތު ލިބުނުއިރު، 22 ދަރިވަރަކު ވަނީ ޓާޝަރީ ތައުލީމު ހާސިލްކޮށްފައެވެ.
ސޮއިކުރުމުގެ ރަސްމިއްޔާތުގައި މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ އިސް އޮފިޝަލުންނާއި މުވައްޒަފުންނާއި، ކޮމިޝަނަރ އޮފް ސިވިލް ސާވިސް ފާތިމަތު ޝަރީފާއި، މިނިސްޓަރ އޮފް ފޮރިން އެފެއާޒް މޫސާ ޒަމީރާއި، ރާއްޖޭގައި ހުންނަ ޖަޕާނުގެ އެމްބަސީގެ އިއްޒަތްތެރިން ބައިވެރިވެވަޑައިގެންނެވިއެވެ.
