ދިވެހި ފޮރިން މިނިސްޓްރީން ނެރުނު ބަޔާނެއްގައި ބުނީ، އިސްރާއީލު ސަރުކާރުގެ އޮފިޝަލުން، ދެ ވަޒީރުންނާއި ނެސެޓްގެ މެންބަރުން ހިމެނޭގޮތަށް، މަސްޖިދުލް އަލް އަޤްޞާއަށް ވަދެ ހިންގި ހަމަނުޖެހުން ދިވެހި ސަރުކާރުން އެންމެ ހަރުކަށި ޢިބާރާތުން ކުށްވެރިކުރާ ކަމަށެވެ.
އިސްރާއީލުގެ އެ ޖަރީމާއަކީ މުސްލިމް އުއްމަތުގެ އެންމެ މުޤައްދަސް އެއް ބިނާގެ ހުރުމަތް ކަނޑާލާ، މުސްލިމުންނާ ދެކޮޅަށް ހިންގި އަނިޔާވެރި އަމަލެއް ކަމުގައި ދެކޭ ކަމަށް މިނިސްޓްރީން ވަނީ ބުނެފައެވެ.
"އިސްރާއީލުން އަލްއަޤްޞާ މިސްކިތަށް ތަކުރާރުކޮށް ވަންނަމުން ދިއުމަކީ މެދުއިރުމަތީ ސަރަޙައްދުގައި ޞުލްޙަ ޤާއިމުކުރުމަށް ކުރެވޭ މަސައްކަތްތަކަށް އެޅިގެންދާ ހުރަހެއްކަމުގައި ދެކި، އެކަމާމެދު ދިވެހިރާއްޖެއިން ކަންބޮޑުވުން ފާޅުކުރަން" މިނިސްޓްރީން ނެރުނު ބަޔާނުގައި ބުންޏެވެ.
Advertisement
މިނިސްޓްރީން ބުނީ، ދިވެހި ސަރުކާރާއި ރައްޔިތުން ތިބީ ފަލަސްޠީނުގެ ރައްޔިތުންނާ އެކުގައި ކަމަށާއި، ފަލަސްޠީނުގައި ހިނގަމުންދާ ހަމަނުޖެހުންތަކަށް ސުލްޙަވެރި އަދި ދެމެހެއްޓެނިވި ޙައްލެއް ހޯދުމަށް ބައިނަލްއަޤްވާމީ މުޖުތަމަޢު ގުޅިގެން އަވަސް ފިޔަވަޅުތަކެއް އެޅުމަށް ގޮވާލާ ކަމަށެވެ.
އިސްރާއީލުގެ ނޭޝަނަލް ސެކިއުރިޓީ މިނިސްޓަރ، އިތަމަރ ބެންވީރު އިސްކޮށް ހުންނަވައިގެން އިސްރާއީލުގެ ގިނަ ބަޔަކު ގޮވައިގެން އިއްޔެގެ ވަގުތެއްގައި ވަނީ އަޤްސާ މިސްކިތަށް ވަދެފައެވެ. އަދި މިސްކިތް ސަރަހައްދުގައި ހުރެ ނަގާފައިވާ ވީޑިއޯއެއްގައި އޭނާ ބުނެފައިވަނީ ފަލަސްތީނުގެ މިނިވަންކަމަށް ޖިހާދު ކުރަމުން އަންނަ ހަމާސް ޖަމާއަތް ބަލިކޮށްލާނެ ކަމަށެވެ.
