ރަޝިއާއާއި ޔޫކްރޭނާއި ދެމެދު ހިނގަމުން އަންނަ ހަނގުރާމައާއި ގުޅިގެން ފޮރިން މިނިސްޓްރީން ނެރުނު ބަޔާނެއްގައި ބުނީ، މިހާރު ހިނގަމުންދާ ޔޫކްރޭން-ރަޝިއާ ހަނގުރާމައާއި ގުޅިގެން، ރަޝިއާގެ ކަރސްކް ސަރަހައްދަށް ނުރައްކާގެ ހާލަތު އޮތުމުން، މިނިސްޓްރިއާއި ޖަރުމަންވިލާތުގައި ހުންނަ ރާއްޖޭގެ އެމްބަސީން ގެންދަނީ ކަރސްކް ސަރަހައްދުގައި ތިބި ދިވެހި ކިޔަވާ ކުދިންގެ ހާލު ގާތުން ބަލަމުން ކަމަށެވެ.
އެހެން ކަމުން މިދަނޑިވަޅުގައި އެސަރަހައްދުގައި ދިރިއުޅުއްވާ އަދި ދަތުރުފަތުރު ކުރައްވާ އެންމެހައި ދިވެހި ރައްޔިތުން އަމިއްލަ ރައްކާތެރިކަމާއި ސަލާމަތްތެރިކަމަށް ހާއްސަ އަހައްމިއްޔަތުކަމެއް ދެއްވުމަށް މިނިސްޓްރީން ވަނީ އިލްތިމާސް ކޮށްފައެވެ.
ރަޝިއާގެ ކަރސްކްގައި އޮތް ނުރައްކަލުގެ ހާލަތައި ގުޅިގެން އެއްވެސް އެހީތެރިކަމެއް ބޭނުންފުޅުވާނަމަ، ޖަރުމަންވިލާތުގައި ހުންނަ ރާއްޖޭގެ އެންބަސީއަށް ގުޅުއްވުމަށް މިނިސްޓްރީން ވަނީ އިލްތިމާސް ކޮށްފައެވެ.
Advertisement
އެމްބަސީއާއި ގުޅޭނެ މައުލޫމާތު:
ފޯން: 491712916461+
ހޮޓްލައިން: 493020073860+
އީމެއިލް: info@maldivesembassy.de
ރަޝިއާއާއި ޔޫކްރޭނާއި ދެމެދު ހިނގަމުން އަންނަ ހަނގުރާމައިގެ ތެރޭގައި ޔޫކްރޭނުން ވަނީ ރަޝިއާގެ ގިނަ ސިޓީތަކަށް އެއްގަމު މަގުން އަރައި ހަމަލާދީފައެވެ. ޔޫކްރޭނުން ހަމަލާދެމުން އަންނަ ރަޝިއާގެ ބައެއް ސިޓީތަކުގެ ތެރޭގައި ބެލްގޮރޮޑް، ކަރސްކް، ބްރިޔަންސް ފަދަ ބޮޑެތި ސިޓީތައް ހިމެނެއެވެ.
