ސައުދީ ވަލީއަހުދު މުޙައްމަދު ބިން ސަލްމާން ވޮޝިންޓަނަށް ވަޑައިގެންފިއެވެ.

ޚަބަރުތައް ބުނާ ގޮތުގައި ސައޫދީގެ ފޯކަސް ހުރީ އެމެރިކާއާއެކު ސިވިލް ނިއުކްލިއާ ކޯޕަރޭޝަން އެގްރީމަންޓެއް ހޯދުމަށެވެ.

އެމެރިކާގެ ހަކަތައާ ބެހޭ ސެކްރެޓަރީ ކްރިސް ރައިޓް ވަރަށް ފަހުން ވަނީ މިފަދަ ހިންޓެއް ދީފައެވެ. އަނެއްކޮޅުން މަސްދަރުތަކުން ދައްކާ ގޮތުގައި ވޮޝިންޓަނުން ވަނީ ސައޫދީ އިން އިސްރާއީލާއެކު ގުޅުން ބާއްވަން އެއްބަސްވާ ނަމަ ނިއުކްލިއާ އެއްބަސްވުމެއް ހެދިދާނެ ކަމަށް ބުނެފައެވެ.

އެހެންކަމުން، ނިއުކްލިއާ މަޝްވަރާތަކާ އެކު އެމެރިކާގެ ރައީސް ޑޮނަލްޑް ޓްރަމްޕް ސައޫދީ އަށް ޕްރެޝަރު ކުރާނީ އަބްރަހަމް އެކޯޑްސް ގައި ސޮއި ކުރުމަށެވެ.

ސައުދީ އަރަބިއްޔާއިން ބޭނުން ވަނީ ޞުލްޙަވެރި ކަމާއި އެކު ނިއުކްލިއާ ހަކަތަ އުފެއްދުމަށެވެ. ނަމަވެސް، ސަރަޙައްދީ ސަލާމަތަށް ބަދަލު އައިސްފިނަމަ ކުރިއަށް އޮތްތަނުގައި ސައޫދީގެ ވިސްނުން ބަދަލުވުމަކީ އެކަށީގެންވާ ކަމެކެވެ. ސަބަބަކީ ތެހެރާން އަކީ ނިއުކްލިއާ ހަތިޔާރު އެޅި ދައުލަތަކަށް ވެއްޖެނަމަ ރިޔާޟް ވެސް ނިއުކްލިއާ ހަތިޔާރު ހޯދާނެ ކަމަށް ފާޅުގައި ބުނެފައި ވާތީއެވެ. މިހެން ވިދާޅުވީ ސީދާ ވަލީއަހުދު މުޙައްމަދު ބިން ސަލްމާނެވެ.