ޔޫ.އޭ.އީގެ ސައިބަރ ސެކިއުރިޓީގެ އިސްވެރިޔާ ރައީސް މުޢިއްޒުއާ ބައްދަލުކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހަށް ޔޫ.އޭ.އީގެ ސައިބަރ ސެކިއުރިޓީގެ އިސްވެރިޔާ ޑރ. މުޙައްމަދު އަލް ކުވައިތީ , މިއަދު އިޙްތިރާމުގެ ޒިޔާރަތެއް ކުރައްވައިފިއެވެ. މި ބައްދަލުވުން ރައީސް އޮފީހުގައެވެ.

މި ބައްދަލުވުމުގައި ދެ ޤައުމުގެ ދެމެދުގައި އޮންނަ ގާތް އަދި އެކުވެރި ގުޅުމަށް އަލިއަޅުވާލެވުނެވެ. ރައީސުލްޖުމްހޫރިއްޔާ ވަނީ ޔޫ.އޭ.އީން ދިވެހިރާއްޖެއަށް ފޯރުކޮށްދީފައިވާ އެހީތެރިކަމާއި ފުރުސަތުތައް ފާހަގަކުރައްވައި، އެއީ ވަރުގަދަ އާއިލީ ގުޅުންތަކެއް ދައްކުވައިދޭ ކަމެއް ކަމަށް ވިދާޅުވެފައެވެ.

މަޝްވަރާތަކުގައި ދެ ޤައުމުގެ އިސްވެރިން ވެސް ޑޭޓާ ޕްރޮޓެކްޝަނާއި ސައިބަރ ސެކިއުރިޓީގެ ދާއިރާގައި އެއްބާރުލުން އިތުރުކުރުމުގެ މުހިންމުކަން ޚާއްޞަ ގޮތެއްގައި ފާހަގަކުރެއްވިއެވެ. އެ ބޭފުޅުން ޑިޖިޓަލް ޕްލެޓްފޯމްތަކުގައި އޮޅުވާލުމުގެ ގޮތުން ފަތުރާ މަޢުލޫމާތާއި ދޮގު ޚަބަރުތަކުގެ ނުރައްކާތެރިކަން އިތުރުވަމުންދާކަން ޤަބޫލުކުރައްވައި، މި ގޮންޖެހުންތަކާ ކުރިމަތިލުމަށް އެކުގައި މަސައްކަތްކުރުމުގެ މުހިންމުކަން ފާހަގަކުރެއްވިއެވެ. މީގެ އިތުރުން، މި ބައްދަލުވުމުގައި ޚާއްޞަ އަހައްމިއްޔަތުކަމެއް ދެވުނީ ސަރުކާރުގެ މުވައްޒަފުންނަށް ތަމްރީނު ދިނުމުގެ ފުރުޞަތުތައް ފުޅާކޮށް، ހަލުވި ދުވެލީގައި ކުރިއަރަމުންދާ ޓެކްނޮލޮޖީގެ ވެށްޓަށް އަހުލުވެރިވުމަށް އެކަށީގެންވާ ވަރަށް ތައްޔާރުވެފައިވާކަން ކަށަވަރުކުރުމަށެވެ.

ރައީސުލްޖުމްހޫރިއްޔާ ވަނީ ރާއްޖޭގެ ޤާނޫނު ތަންފީޒުކުރުމުގެ ޤާބިލުކަން އިތުރުކުރުމަށް ޔޫ.އޭ.އީން ކުރަމުންދާ މަޝްރޫޢު ފާހަގަކުރައްވައި، ހިޒް ހައިނެސް ޝެއިޚް މުހައްމަދު ބިން ޒައިދު އަލް ނަހްޔާންގެ ލީޑަޝިޕާއި ސްޓްރެޓެޖިކް ގުޅުންތައް ބަދަހިކުރުމަށް ކުރައްވާ މަސައްކަތްތަކުގެ އަގުވަޒަން ކުރައްވާފައެވެ.

ބައްދަލުވުން ނިމުމުގެ ކުރިން، ރައީސުލްޖުމްހޫރިއްޔާ އާއި ޔޫ.އޭ.އީގެ ސައިބަރ ސެކިއުރިޓީ ޗީފް ވަނީ ދެޤައުމުގެ ގުޅުން އިތުރަށް ބަދަހިކޮށް، ދެޤައުމަށް ފައިދާހުރި މުހިއްމު ދާއިރާތަކުން އެއްބާރުލުން އިތުރަށް ވަރުގަދަކުރުމަށް އެއްބަސްވެވަޑައިގެންފައެވެ.

މި ބައްދަލުވުމަކީ ދިވެހިރާއްޖެއާއި ޔޫ.އޭ.އީއާއި ދެމެދު ކުރިއަށް އޮތް ތަނުގައި އެއްބާރުލުން އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، މި ބައްދަލުވުމުގެ މަޤްޞަދަކީ ދެ ޤައުމުގެ މެދުގައި ޞުލްޙަވެރި އަދި ފާގަތި މުސްތަޤްބަލެއް ބިނާކުރުމުގެ ހިއްސާކުރެވޭ ތަޞައްވުރު އިތުރަށް ވަރުގަދަކުރުމެވެ.