ގއ. ކޮލަމާފުއްޓަށް މަސްތުވާތަކެތި އެތެރެ ކުރާ ކަމަށް ފުލުހުންނަށް ލިބުނު އިންޓެލިޖަންސް މައުލޫމާތަކާ ގުޅިގެން ހިންގި ހާއްސަ އޮޕަރޭޝަނެއްގެ ދަށުން ލޯންޗެއް ބަލައި ފާސްކުރުމުގެ ތެރޭގައި މަސްތުވާތަކެއްޗާއެކު ހަތަރު މީހަކު ހައްޔަރުކޮށްފި އެވެ. މި ހަތަރު މީހުންވެސް ހައްޔަރުކޮށްފައިވަނީ ރޭގެ ވަގުތެއްގަ އެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެވިފައިވަނީ ހަސަން ރައްޔާން ރާޝިދު (26އ)، އިސްމާއިލް ހައިޒަމް ހަބީބް (22އ)، އަލީ ޖަނާހް ޖައުފަރު (25އ) ގެ އިތުރުން އިބްރާހިމް އަޒާން މުހައްމަދު (19އ) އެވެ. މި އެންމެން ވެސް ނިސްބަތްވަނީ ގއ. ކޮލަމާފުއްޓަށެވެ.
ފުލުހުން ބުނެފައިވަނީ އެ ހަތަރު މީހުން ފުލުހުންގެ ބެލުމުގެ ދަށަށް ގެނެސްފައިވަނީ އެމީހުން ކޮލަމާފުއްޓަށް އައި ލޯންޗު ބަލައި ފާސްކުރިއިރު ގިނަ އަދަދެއްގެ މަސްތުވާތަކެތި ކަމަށް ބެލެވޭ އެއްޗިސް ތަކެއް ފެނިފައިވާތީ ކަމަށެވެ. އެގޮތުން މަސްތުވާތަކެތި ހުރި ކަމަށް ބެލެވޭ 30 ރަބަރު ޕެކެޓާއި، ފިލްމް ހުސްކުރި ދެ ދަޅާއި، އެތަނުން މީހެއްގެ ހަށިގަނޑު ބަލައި ފާސްކުރިއިރު މަސްތުވާތަކެތި ހުރި ކަމަށް ބެލެވޭ ހަތް ސެލޯފޭން ފެނިފައިވާ ކަމަށް ފުލުހުން ބުނެފައިވެ އެވެ. އަދި މި ތަކެތީގެ ވަގުތީ ބަރުދަނުގައި 44.83 ގުރާމް ހުރިކަމަށް ވެސް ފުލުހުން މައުލޫމާތު ދެއެވެ.
Advertisement
ޚުލާސާ އަށް މައުލޫމާތު ލިބިފައިވާ ގޮތުގައި އެ ލޯންޗު ކޮލަމާފުއްޓަށް އައިސްފައިވަނީ ވިލިނގިލިންނެވެ. މި ހަތަރު މީހުންގެ އިތުރުން އެ ލޯންޗުން ދަތުރުކުރި ދެ އަންހެން މީހުންވެސް ހައްޔަރުކުރި ކަމަށް ޚުލާސާ އަށް މައުލޫމާތު ލިބެ އެވެ. ނަމަވެސް މަސްތުވާތަކެތި އެ ދެ އަންހެން މީހުން އަތުން ނުފެންނާތީ ވަނީ ދޫކޮށްލާފަ އެވެ.
މި މައްސަލައިގައި ހައްޔަރުކޮށްފައިވާ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އިސްމާއިލް ހައިޒަމް ހަބީބް 12 ދުވަހަށް ބަންދުކޮށް ދެން ތިބި މީހުން ހަތް ދުވަހަށް ބަންދުކުރުމަށް ގާޒީ ވަނީ އަމުރުކޮށްފަ އެވެ.
މި މައްސަލަ ތަހުގީގުކުރަމުންދާ ކަމަށް ފުލުނުން ބުނެ އެވެ.
