ރައްޔިތުންނާ ގާތުން ބައްދަލުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލާމު އަތޮޅަށް މިއަދު ފުރައިވަޑައިގެންފި އެވެ.
މިދިޔަ ބުރާސްފަތި ދުވަހު ށ. އަތޮޅަށް ކުރެއްވި ހަތަރު ދުވަހުގެ ދަތުރުފުޅު ނިންމަވާލެއްވުމަށްފަހު މިއަދު ލ. އަތޮޅަށް ފެއްޓެވި މި ދަތުރުފުޅަކީ ތިން ދުވަހުގެ ދަތުރުފުޅެކެވެ.
އަތޮޅުތަކަށް ރައީސުލްޖުމްހޫރިއްޔާ ކުރައްވާ ރަސްމީ ދަތުރުފުޅުތަކުގެ މައިގަނޑު މަގްސަދަކީ މީހުން ދިރިއުޅޭ ރަށްރަށުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރައްވައި، އެ ރަށްރަށުގެ ތަރައްގީއަށް ބޭނުންވާ ކަންކަމާއި ރައްޔިތުން އެންމެ އެދޭ ކަންކަމާ ގުޅޭގޮތުން މަޝްވަރާ ކުރެއްވުމެވެ. އަދި މީގެ އިތުރުން ރަށްރަށަށް ތަރައްގީގެ ގޮތުން ބޭނުންވާ ކަންކަން އޮޅުންފިލުވައި އެކަންކަމަށް ހައްލު ހޯއްދަވައިދެއްވުމެވެ.
ށ. އަތޮޅަށް ކުރައްވާ މި ދަތުރުފުޅުގައި މީހުން ދިރިއުޅޭ 11 ރަށަކަށް ވަޑައިގަތުމަށް ވަނީ ހަމަޖެހިފައެވެ. އެގޮތުން، އިސްދޫ، ކަލައިދޫ، ދަނބިދޫ، މާބައިދޫ، މުންޑޫ، ގަން، ފޮނަދޫ، މާމެންދޫ، ހިތަދޫ، ކުނަހަންދޫ އަދި މާވަށަށް އެމަނިކުފާނު ވަޑައިގަންނަވާނެ އެވެ. ރައީސުލްޖުމްހޫރިއްޔާގެ މި ދަތުރުފުޅުގައި، އެމަނިކުފާނުގެ އަރިހުގައި ބައެއް ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ބައިވެރިވެވަޑައިގަންނެވި އެވެ.
ނިމިދިޔަ ހަފްތާގައި އެމަނިކުފާނު ށ. އަތޮޅަށް ކުރެއްވި ދަތުރުފުޅުގައި އެ އަތޮޅުގެ ރަށްރަށުގެ ތަރައްގީއަށް ސަރުކާރުން ކުރިއަށްގެންދާ ގިނަ މަޝްރޫއުތައް ފައްޓަވައިދެއްވައި ރަށްރަށުގައި ނިމިފައި ހުރި މަޝްރޫއުތައް އިފްތިތާހުކޮށްދެއްވާފަ އެވެ. އަދި އެންމެ ފާހަގަކޮށްލެވެނީ އެ އަތޮޅުގެ ތިން ރަށެއްގައި އެއާޕޯޓް އެޅުމުގެ އަމަލީ މަޝްރޫއު ފެއްޓެވުމެވެ.
ލާމު އަތޮޅުގެ އާބާދީއަކީ 19،275 މީހުންނެވެ. އެ އަތޮޅަކީ ރާއްޖޭގެ ނިސްބަތުން އެންމެ ތަރައްގީ އެއް އަތޮޅެވެ.
