އެމެރިކާއިން ޗައިނާ އާއި ދެކޮޅަށް ވިޔަފާރީގެ ހަނގުރާމައެއް ކުރަމުންދާ މި ދަނޑިވަޅުގައި، މި އަހަރު ޗައިނާގެ އިޤްތިޞާދު 4.8 ޕަސެންޓަށް ކުރިއަރާނެ ކަމަށް އިންޓަރނޭޝަނަލް މަނިޓަރީ ފަންޑް (އައި.އެމް.އެފް) އިން ބުނެފިއެވެ. އައިއެމްއެފް އިން ބުނީ އެމެރިކާގެ އިޤްތިޞާދު މި އަހަރު ކުރިއަރާނެ ކަމަށް ލަފާކުރެވެނީ އެންމެ 2.0 ޕަސެންޓަށް ކަމަށެވެ.
އައި.އެމް.އެފްގެ އެންމެ ފަހުގެ ރިޕޯޓުގައިވާ ގޮތުން އުފެއްދުންތެރިކަން އިތުރުވެފައިވާ ޗައިނާގެ އިޤްތިޞާދު ކުރިއަރަމުންދާ މައިގަނޑު ސަބަބަކީ އެތެރޭގެ ޑިމާންޑް އިތުރުވުމާއި، ހައިޓެކް އެކްސްޕޯޓް ފުޅާވުމެވެ.
ޗައިނާއިން އަޅާފައިވާ ހަރުދަނާ ފިޔަވަޅުތަކުގެ ސަބަބުން އެމެރިކާ އާއި ޗައިނާ އާއި ދެމެދު ހިނގަމުންދާ ވިޔަފާރީގެ މައްސަލަތަކުގެ އަސަރުތައް ފޫބެއްދުމަށް އެހީތެރިވެދީފައިވެއެވެ.
ޗައިނާއިން ކުރިއަރަމުންދާތީ އެކަން އެމެރިކާ އަށް ހަޖަމް ނުކުރެވިގެން ޗައިނާގެ އިޤްތިޞާދީ ދުވެލި މަޑުޖައްސައިލުމަށް ވޮޝިންޓަނުން ވަނީ ޗައިނާގެ އިލެކްޓްރިކް ވެހިކަލްތަކާއި ސެމީ ކޮންޑަކްޓަރުތައް ފަދަ އެތައް ބާވަތަކުން ބޮޑު ޓެރިފެއް އިޢުލާންކޮށްފައެވެ. އަދި ކޮމްޕިއުޓަރ ޗިޕްތަކާއި އެ ނޫންވެސް ސާމާނު ޗައިނާ އިން އެމެރިކާއަށް އެތެރެކުރެވޭނެ މިންވަރު ވެސް މަދުކޮށްފައެވެ. މީގެ އިތުރުން ޔޫރަޕާއި އޭޝިއާގައި ތިބި އެމެރިކާގެ “ޕަޕެޓް” ސަރުކާރުތަކާއި ކުންފުނިތަކުން ޗައިނާ އިން މުދާ ގަތުމުގެ ބަދަލުގައި އެހެން ދިމަދިމާތަކުން މުދާ ގަތުމަށް ވެސް އެމެރިކާއިން ވަނީ ޕްރެޝަރު ކޮށްފައެވެ.
އެމެރިކާގެ މި ޢަމަލުތަކުގެ ސަބަބުން ހުރަސްތައް ފޫބައްދަން ބެއިޖިން އިން ހެދި ގޮތަކީ ރަޝިޔާ، މެދުއިރުމަތި އަދި ދުނިޔޭގެ ދެކުނުފަޅީގެ ޤައުމުތަކާއި އެކު ޕާޓްނަޝިޕްތައް ވަރުގަދަކުރަން ފެށުމެވެ.
