މިއަދަކީ ބައިނަލް އަޤްވާމީ ގޮތުން ފާޙަގަކުރާ 24ވަނަ ޒުވާނުންގެ ދުވަހެވެ. ދުވަހާއި ކުރިމަތިލިއިރު ޒުވާނުންނަށް މިއަދު ބޮޑެތި ގޮންޖެހުންތަކެއް ކުރިމަތިވެފައިވެއެވެ. ގިނަ ބައެއްގެ ދިރިއުޅުމަށް މަސްތުވާތަކެތީގެ އަސަރުކޮށްފައިވާއިރު، އޭގެ ތެރޭގައި ހެރޮއިން އާއި އެހެނިހެން ގެއްލުން ހުރި ތަކެތި ހިމެނޭކަން ނޭޝަނަލް ޑްރަގް އެޖެންސީ، އެންޑީއޭގައި ފަރުވާ ހޯދުމަށް އެދި ޖާގަ ނުލިބިގެން ޒުވާނުން ކިޔޫގައި ތިބުމުން އެނގެއެވެ.

ނޭދެވޭ ކަންތަކުގައި ޒުވާނުންގެ ބައިވެރިވުން އިތުރުވުމުގެ ސަބަބުން ބައެއް ޒުވާން އުމުރުގެ ކުދިންނާއި މީހުންގެ ސުލޫކަށް ކަންބޮޑުވާ ބަދަލެއް އައިސްފައިވެއެވެ. ނަމަވެސް އެހެން ގިނަ ގައުމުތަކާ ހިލާފަށް ރާއްޖެއިން ނިސްބަތުން މަދުން ނަމަވެސް ޒުވާނުން މަރާލުމުގެ ހާދިސާތައް ފެނިފައިވާއިރު، މިކަމުން ދޭހަވަނީ ހާލަތު އުނދަގޫ ނަމަވެސް ކޮންޓްރޯލުން ބޭރުގައި ނެތްކަމެވެ.

މި ގޮންޖެހުންތަކުގެ އަލީގައި ރައީސް ޑރ.މުޙައްމަދު މުއިއްޒުގެ ލީޑަޝިޕްގެ ދަށުން މިހާރު ހިނގަމުންދާ ސަރުކާރަކީ ދިވެހި ޒުވާނުންނަށް އުއްމީދު ދިނުމަށް ވައުދުވެފައިވާ ސަރުކާރެކެވެ. ޤައުމުގެ މުސްތަޤްބަލުގައި ޒުވާނުން އަދާކުރާ މުހިންމު ދައުރު ދެނެގަނެ، ސަރުކާރުން ދަނީ ފަނާކުރަނިވި އާދަތަކަށް ވެއްޓިފައި ތިބި ޒުވާނުންނަށް ، ކުރިއެރުމާއި ތަރައްޤީއަށް ރަނގަޅު ފުރުޞަތުތައް ހުށަހެޅުމުގެ މަޤްޞަދުގައި ފުރިހަމަ މަސައްކަތްތަކެއް ކުރިއަށް ގެންދަމުންނެވެ.

މި ކޮމިޓްމަންޓްގެ ތަޅުދަނޑިއަކީ ތައުލީމީ އަދި ވަޒީފާގެ ފުރުސަތުތައް އިތުރުކުރުމާއި، ނަފްސާނީ ސިއްހަތަށް އެހީތެރިކަން ފޯރުކޮށްދިނުމާއި، މަސްތުވާތަކެތީގެ ނުރައްކާތެރިކަމާ މެދު ހޭލުންތެރިކަން އުފެއްދުމަށް ސަމާލުކަން ދިނުމެވެ. އަދި ޒުވާނުންނަށް ކުރިއަރާނެ ސަޕޯޓިވް މާހައުލެއް ގާއިމް ކުރުމަށް ވެސް ސަރުކާރުން ދަނީ ކޮމިއުނިޓީ ލީޑަރުންނާއި ތައުލީމީ ދާއިރާގެ ފަރާތްތަކާއި ބެލެނިވެރިންނާ ގާތުން މަސައްކަތް ކުރަމުންނެވެ. އެކަން ޒުވާނުންގެ މިނިސްޓަރު އިބްރާހީމް ވަހީދު އެގެންދަނީ ކުރައްވަމުންނެވެ.

ހަރުދަނާ، ތަނަވަސް ގައުމެއް ބިނާކުރުމުގައި ޒުވާނުންގެ ބައިވެރިވުމުގެ މުހިންމުކަން ރައީސް މުއިއްޒު ވަނީ ތަކުރާރުކޮށް ވިދާޅުވެފައެވެ. ސަރުކާރުގެ އިސްނެގުމަކީ ހަމައެކަނި ޒުވާނުންނަށް ދިމާވާ އަވަސް ގޮންޖެހުންތަކަށް ހައްލެއް ހޯދައިދިނުމުގެ އިތުރުން އެ ޒުވާނުންނަށް އުޖާލާ، އުއްމީދީ މުސްތަގުބަލެއް ކަށަވަރުކޮށްދިނުމަށް ފަރުމާކޮށްފައިވާ ކަންކަމެވެ.

ޒުވާނުންގެ އަނިޔާވެރިކަމާއި މަރުގެ މައްސަލަ ތަކުގައި ހިމެނޭ ޒުވާނުން ގިނަ ގައުމުތަކާ އަޅާބަލާއިރު ރާއްޖޭގައި ވަރަށް މަދެވެ. އެހެންކަމުން ރާއްޖެއަކީ ޒުވާން ރައްޔިތުންނަށް ނިސްބަތުން ރައްކާތެރި މާހައުލެކެވެ. 

އަނިޔާވެރިކަމާއި، އަމިއްލައަށް މަރުވުމާއި، އޯވަޑޯޒްވުމާއި، އެހެނިހެން ސަބަބުތަކާހުރެ ޒުވާނުން މަރުވާ މިންވަރު ގައުމުތަކުގެ ތެރޭގައި ވަރަށް ބޮޑަށް ތަފާތުވާއިރު، ވަކި ގައުމުތަކުގައި ބިރުވެރިކަމުގެ ނިސްބަތް މަތިވެފައިވެއެވެ. މިފަދަ ސަބަބުތަކާހުރެ ޒުވާނުން އެންމެ ގިނައިން މަރުވާ 10 ޤައުމުގެ ތެރޭގައި އާންމުކޮށް ހިމެނެނީ؛

އެމެރިކާ: އަހަރަކު ގާތްގަނޑަކަށް 45،000 ޒުވާނުން މަރުވާއިރު، މީގެތެރޭގައި އެންމެ ގިނައީ މާރާމާރީ އާއި އޯވަޑޯޒްގެ ސަބަބުން މަރުވާ މީހުންނެވެ.

ބްރެޒިލް: އަހަރަކު ގާތްގަނޑަކަށް 30،000 ޒުވާނުން މަރުވާއިރު، އޭގެ މައިގަނޑު ސަބަބަކީ ގޭންގް ވައިލެންސް އާއި މަރުގެ މައްސަލަތަކެވެ.

އިންޑިއާ: ތައުލީމީ ޕްރެޝަރާއި އިޖުތިމާއީ މައްސަލަތައް ފަދަ ކަންތައްތަކުގެ ސަބަބުން އަހަރަކު ގާތްގަނޑަކަށް 25،000 ޒުވާނުން އަމިއްލައަށް މަރުވެ އެވެ.

މެކްސިކޯ: އަހަރަކު ގާތްގަނޑަކަށް 20،000 ޒުވާނުން މަރުވާއިރު، އޭގެ ބޮޑު ސަބަބަކީ މަސްތުވާތަކެއްޗާ ގުޅުން ހުރި ގޭންގް ވައިލެންސްއެވެ.

ރަޝިޔާ: އަހަރަކު ގާތްގަނޑަކަށް 15،000 ޒުވާނުން މަރުވާއިރު، އަމިއްލައަށް މަރުވުމާއި ބަނގުރާއާ ގުޅުން ހުރި ހާދިސާތަކަކީ އޭގެ ބޮޑު ސަބަބުތަކެކެވެ.

ދެކުނު އެފްރިކާ: މައިގަނޑު ގޮތެއްގައި ގޭންގް ވައިލެންސް، ، އެޗްއައިވީ/އެއިޑްސް އާއި ގުޅުން ހުރި މައްސަލަ ތަކުގެ ސަބަބުން އަހަރަކު ގާތްގަނޑަކަށް 12،000 ޒުވާނުން މަރުވެއެވެ.

ނައިޖީރިއާ: އަހަރަކު ގާތްގަނޑަކަށް 10،000 ޒުވާނުން މަރުވާއިރު، އޭގެ ސަބަބުތަކުގެ ތެރޭގައި ގޭންގް ވައިލެންސް، ޒިނޭގެ އަމަލުތަކުގެ ސަބަބުން ދިމާވާ ކަންތައްތައް ހިމެނެ އެވެ.

ކޮލަމްބިއާ: އަހަރަކު ގާތްގަނޑަކަށް 9،000 ޒުވާނުން މަރުވާއިރު، އޭގެ މައިގަނޑު ސަބަބަކީ ގޭންގް ވައިލެންސް އާއި މަސްތުވާތަކެއްޗާ ގުޅުން ހުރި ޖަރީމާތަކެވެ.

ވެނެޒުއެލާ: ސިޔާސީ ނުތަނަވަސްކަމާއި، ގޭންގް އަނިޔާވެރިކަމާއި، އިގްތިސާދީ ދަތިތަކުގެ ސަބަބުން އަހަރަކު ގާތްގަނޑަކަށް 8،000 ޒުވާނުން މަރުވެއެވެ.

ފިލިޕީންސް: އަހަރަކު ގާތްގަނޑަކަށް 7،000 ޒުވާނުން މަރުވާއިރު، މީގެތެރޭގައި ގިނައީ ގޭންގު ކުށްތަކާއި ގުޅިގެން ހިނގާ މަރުގެ ހާދިސާތަކެވެ.

މި ތަފާސް ހިސާބުތަކުގެ މައްޗަށް ނަޒަރު ހިންގާލުމުން، ދިވެހި ސަރުކާރުތަކުން މި ދިވެހި ފަސްގަނޑު އެހެން ޤައުމުތަކާއި އަޅާބަލާއިރު ވަރަށް ބޮޑަށް ކޮންޓުރޯލް ކޮށްފައި އޮތްކަން އެބަ އެނގެއެވެ.

އެހެންނަމަވެސް ރާއްޖޭގެ އާބާދީގެ ނިސްބަތުންނާއި ގަބޫލުކުރާ ދީނީ ފިކުރުގެ ސަބަބުން ރާއްޖޭގައި ކުށްކުރާ ޒުވާނުންގެ އަދަދު މިއަށްވުރެ ކުޑަ ކުރެވޭނެ ކަމަށް ގަބޫލުކުރާ މީހުން ގިނައެވެ. 

ސަރުކާރުގެ އަމާޒަކީ ސަރުކާރުގެ ޕްރޮއެކްޓިވް އެޕްރޯޗްގެ ސަބަބުން ޒުވާނުންނަށް ގާނޫނާ ހިލާފު ކަންކަމުގެ ނުރައްކާތަކުން ރައްކާތެރިވެ، މުޖުތަމައަށް ހެޔޮ ގޮތުގައި ޙިއްޞާ ކުރުމުގެ ބާރު ލިބިގެންދިޔުން އިތުރު ކުރުމެވެ.

ސަރުކާރާއި މުޖުތަމައު، އަދި އާއިލާތަކުގެ ފަރާތުން ދެމިއޮތް އެއްބާރުލުމާއެކު، ދިވެހި ޒުވާނުންގެ މުސްތަގުބަލު ފެންނަނީ އުއްމީދީ ގޮތަކަށެވެ. ޒުވާނުންނަށް އިސްކަންދިނުމަށް ސަރުކާރުން ކުރާ ފަސްނުޖެހޭ ވައުދަކީ އުއްމީދުގެ ހުޅުކޮޅު ކަމަށާއި، މިއީ ރަނގަޅު، އުޖާލާ މުސްތަގުބަލެއް އަތްފޯރާފަށުގައި އޮތް ކަމުގެ އިޝާރާތެކެވެ.