އިންޑިއާ އައުޓް ހަރަކާތާއި ޚާރިޖީ ގުޅުންތަކަށް ކުރާ އަސަރާ ގުޅޭ ގޮތުން މީޑިއާތަކުން ކުރި ސުވާލުތަކަށް ޖަވާބު ދެއްވަމުން ރައީސް މުހައްމަދު މުއިއްޒު ވަނީ ރާއްޖޭގެ އިސްތިގުލާލު ހިމާޔަތް ކުރުމަށް ވައުދުވެވަޑައިގަންނަވާކަން ވަރަށް ބޮޑަށް ކަށަވަރުކޮށްދެއްވާފަ އެވެ. އެ ހަރަކާތަށް ސަރުކާރުން މައާފަށް އެދެން ޖެހޭ ކަމަށް ބުނާ ޚިޔާލު ދޮގުކުރައްވައި، އެމަނިކުފާނުގެ ވެރިކަމުގައި އެންމެ ބޮޑަށް އިސްކަންދެނީ ގައުމުގެ މަސްލަހަތަށް ކަމަށް ވިދާޅުވި އެވެ.
ރައީސް ވިދާޅުވީ ރާއްޖޭގެ މިނިވަންކަމާއި އިސްތިގުލާލު ހިމާޔަތް ކުރުމަށްޓަކައި ތަފާތުކުރުމެއްނެތި ހުރިހާ ގައުމަކާ ގާތް ގުޅުންތައް ބަހައްޓާނެ ކަމަށެވެ.
Advertisement
ރައީސް ވިދާޅުވީ ސަރުކާރުގެ ޚާރިޖީ ސިޔާސަތަކީ ބައިނަލްއަގްވާމީ ގުޅުންތަކުގައި ބެލެންސްޑް ގޮތަކަށް ގެންގުޅުއްވުމެވެ.
ރައީސް ވަނީ އެމަނިކުފާނުގެ ވެރިކަމަށް ވަޑައިގަތުމުގެ ކުރިން، އިންޑިއާ ސިފައިން ތިބުމާ މެދު އާންމުންގެ ހިތްހަމަނުޖެހުން ގަބޫލުކުރައްވައި، މި ކަންބޮޑުވުންތަކަށް ޑިޕްލޮމެޓިކް މަޝްވަރާގެ ތެރެއިން ސުލްހަވެރިކަމާއެކު ހައްލެއް ހޯދިކަން ފާހަގަކުރައްވާފައެވެ. އަދި އިންޑިއާއާއި ރާއްޖެއާ ދެމެދު ދެމިއޮތް އެކުވެރިކަމުގެ އަގުވަޒަން ކުރެއްވިއެވެ.
