ރައީސް ޑރ. މުހައްމަދު މުއިއްޒު މާލެ ސިޓީ ކައުންސިލަށް ވަޑައިގެން މެންބަރުންނާއި ބައްދަލުކޮށްފި

ރައީސް ޑރ. މުޙައްމަދު މުއިއްޒު މާލެ ސިޓީ ކައުސިލަށް ވަޑައިގެން ކައުންސިލް މެންބަރުންނާއި ބައްދަލުކުރައްވައިފިއެވެ.

އެމަނިކުފާނު ވަނީ މިއަދު ހެނދުނު ކައުންސިލްގެ ޤަވާޢިދާއި އެއްގޮތްވާ ގޮތުގެ މަތިން ބޭއްވި 4 ވަނަ ދައުރުގެ ފުރަތަމަ ހާއްސަ ޖަލްސާގައި މާލޭ ސިޓީ ކައުންސިލާއި އަންހެނުންގެ ތަރައްގީއާ ބެހޭ ކޮމިޓީއަށް އަލަށް އިންތިހާބުވި މެމްބަރުންނާ ބައްދަލުކުރައްވައިފަ އެވެ. މިއީ ސަރުކާރާއި ލޯކަލް އޮތޯރިޓީތަކާ ދެމެދު ގާތް މަސައްކަތުގެ ގުޅުމެއް ގާއިމް ކުރުމަށް، އިންތިޚާބުވިފަހުން ރައީސުލްޖުމްހޫރިއްޔާ ކުރެއްވި މިފަދަ ފުރަތަމަ ބައްދަލުވުންކަން ފާހަގަ ކުރެވެއެވެ.

މި ބައްދަލުވުމުގައި ރައީސުލްޖުމްހޫރިއްޔާ އާއި ކައުންސިލް މެމްބަރުން ވަނީ މާލެއަށް ދިމާވެފައިވާ އެކިއެކި ދަތިތަކާއި ގޮންޖެހުންތަކުގެ އިތުރުން އެކަންކަން ހައްލުކުރުމަށް ކައުންސިލުން ރާވާފައިވާ ކަންކަމާ ބެހޭގޮތުން މަޝްވަރާކުރައްވާފައެވެ. މުހިންމު މައުޟޫއުތަކުގެ ތެރޭގައި ބޯހިޔާވަހިކަމާއި، އިންފްރާސްޓްރަކްޗަރ ތަރައްޤީކުރުމާއި، މާލޭ ސިޓީގައި އާންމު ޚިދުމަތްތައް އިތުރުކުރުން ހިމެނެއެވެ.

މި މަޝްވަރާތަކުގެ މަޤްޞަދަކީ ރައްޔިތުންގެ ބޭނުންތައް ފައިދާހުރި ގޮތެއްގައި ފުއްދައިދިނުމަށްޓަކައި ކައުންސިލްގެ އަމާޒުތައް ސަރުކާރުގެ ފުޅާ މަޤްޞަދުތަކާ އެއްގޮތްކޮށްދިނުމެވެ.

މާލޭ ސިޓީގެ މޭޔަރު އާދަމް އާޒިމް ވަނީ އިސްނެންގެވި މި މުހިއްމު މަޝްވަރާތަކަށްޓަކައި ރައީސުލްޖުމްހޫރިއްޔާއަށް ޝުކުރު އަދާކުރައްވާފައެވެ. "މިއީ ރައީސަކު ރަސްމީ ގޮތެއްގައި މާލެ ސިޓީ ކައުންސިލަށް ޒިޔާރަތް ކުރި ފުރަތަމަ ފަހަރު. މީގެއިން ފާހަގަވެގެން ދަނީ ލާމަރުކަޒީ ނިޒާމެއް ހަރުދަނާ ކުރުމަށް އެންމެން ގުޅިގެން މަސައްކަތަށް ކުރަން ރައީސް އިސްނަންގަވާކަން" އެއްބާރުލުން ކުރިއެރުވުމުގައި ބައްދަލުވުމުގެ މުހިންމުކަން ފާހަގަކުރައްވައި އާޒިމް ވިދާޅުވި އެވެ.

މި ބައްދަލުވުމުގެ ސަބަބުން މާލެ ސިޓީ ކައުންސިލާއި މަރުކަޒީ ސަރުކާރާ ދެމެދު ވަރުގަދަ ގުޅުމެއް އުފެދި، މާލޭ ސިޓީގެ ރައްޔިތުންނަށް ފައިދާ ކުރާނެ ކަމަށް ބެލެވެ އެވެ.