ފެނަކީ "ދިރިއުޅުމުގެ ޖާދޫ" ގެ ގޮތުގައި ގިނަ ފަހަރު ހަވާލާދެވޭ އެއްޗެކެވެ. މިފަދައިން ގިނައިން ހަވާލާދެވެނީ އެކަށީގެންވާ ސަބަބަކާ ހުރެއެވެ. އިންސާނާގެ ހަށިގަނޑުގެ ގާތްގަނޑަކަށް 60 އިންސައްތައަކީ ފެނެވެ. މި ނިސްބަތުގެ ފެން ހިފެހެއްޓުމަކީ ދުޅަހެޔޮ ސިއްޙަތެއް ދެމެހެއްޓުމަށް ނުހަނު މުހިންމު ކަމެކެވެ. ހަށިގަނޑުގެ ހަކަތައިގެ މިންވަރު މަތީގައި ހިފެހެއްޓުމާއި، ނަފްސާނީ ދުޅަހެޔޮކަން ކުރިއެރުވުމުގައި ވެސް ފެނުގެ ދައުރު ފާހަގަކޮށްލެވެއެވެ. އެހެންކަމުން، އެކަށީގެންވާ މިންވަރަށް ހައިޑްރޭޓްވެފައި ހުރުމަކީ ޖުމުލަ ސިއްޙަތު ރަނގަޅުކޮށް ދެމެހެއްޓުމަށް އޮތް އެންމެ ލުއިފަސޭހަ އަދި އެންމެ ފައިދާ ބޮޑު އެއް ވަސީލަތެވެ.

ހައިޑްރޭޝަން މުހިންމީ ކީއްވެގެން ހެއްޔެވެ؟

ފެނަކީ އިންސާނާގެ ހަށިގަނޑުގެ އަސާސީ ގިނަ މަސައްކަތްތަކަށް ކޮންމެހެން ބޭނުންވާ މާއްދާއެކެވެ. މިގޮތުން ފެން އަދާކުރާ މުހިންމު ދައުރުތަކުގެ ތެރޭގައި ހަށިގަނޑުގެ ފިނިހޫނުމިން ބެލެހެއްޓުމާއި، ހަޖަމުކުރުމަށް އެހީތެރިވުމާއި، ހަށިގަނޑުން ނުރައްކާތެރި މާއްދާތައް ބޭރުކުރުމާއި، ހުޅުތައް ފަސޭހައިން މަސައްކަތް ކޮށްދިނުމާއި، ހަމުގެ ދުޅަހެޔޮކަން ދެމެހެއްޓުން ހިމެނެއެވެ.

ޚާއްޞަކޮށް ޖިސްމާނީ ހަރަކާތްތެރިކަން އިތުރުވާ ވަގުތުތަކުގައި ނުވަތަ ހޫނު މޫސުމުގައި، ފެނަކީ ހަށިގަނޑުގެ ފިނިހޫނުމިން ހަމަޖެހޭ މިންގަނޑެއްގައި ހިފެހެއްޓުމަށް އެހީތެރިވެދޭ މުހިންމު ވަސީލަތެކެވެ.

ހަޖަމުކުރުމުގެ ނިޒާމުގައިވެސް ފެނުގެ ދައުރު ވަރަށް ބޮޑެވެ. ކުޑަކަމުދާ އެއްޗެއްސާއި، ބޮޑުކަމުދާ އެއްޗެހީގެ ޒަރީއާއިން ހަށިގަނޑުން ވިހަ އަދި ބޭނުމެއް ނެތް ތަކެތި ބޭރުކުރުމަށް ހަށިގަނޑުން ފެން ބޭނުންކުރެއެވެ. ފެން ބުއިމުން ހަށިގަނޑަށް ބޭނުމެއް ނެތް ތަކެތި ފަސޭހަކަމާއެކު ނައްތާލެވޭކަން ކަށަވަރުކޮށްދެއެވެ.

ސައިނޯވިއަލް ދިޔައަކީ ހުޅުތަކަށް ލުބްރިކަންޓެއްގެ ގޮތުގައި މަސައްކަތްކުރާ، ހަރަކާތްތެރިކަން ފަސޭހަކޮށްދޭ އަދި އަނިޔާ ލިބުމުގެ ނުރައްކާ މަދުކޮށްދޭ މުހިންމު މާއްދާއެކެވެ. މި ދިޔައިގެ މުހިންމުކަން ޚާއްޞަކޮށް ފާހަގަކުރެވެނީ ގަވާއިދުން ކަސްރަތުކުރާ މީހުންނަށާއި، އާތުރައިޓިސް (ރާއްޖެ ބަލި) ފަދަ ހާލަތްތަކަށް ޝިކާރައަކަށްވެފައިވާ ފަރާތްތަކަށެވެ.

މީގެ އިތުރުން، ހަށިގަނޑު ރަނގަޅަށް ހައިޑްރޭޓްވެފައި ހުރުމަކީ ހަންގަނޑުގެ އިލާސްޓިސިޓީ ދެމެހެއްޓުމަށާއި، ހިކުމާއި ރިއްސުން ހުއްޓުވުމަށް އެހީތެރިވެދޭ ކަމެކެވެ. މިކަމުގެ ސަބަބުން ހަންގަނޑު ދުޅަހެޔޮކަމާއެކު ޒުވާން ސިފައެއްގައި ދެމެހެއްޓުމަށް މަގުފަހިވެގެންދެއެވެ.

ހަށިގަނޑުން ފެން މަދުވެފައިވާކަމުގެ ނިޝާންތައް

ޑީހައިޑްރޭޝަން ކުރިމަތިވަނީ ހަށިގަނޑުން ބޭރުވާ ފެނުގެ މިންވަރު، ހަށިގަނޑަށް ލިބޭ ފެނުގެ މިންވަރަށްވުރެ އިތުރުވުމުގެ ސަބަބުންނެވެ. މި ހާލަތު މަޑުމަޑުން ކުރިމަތިވިޔަސް، އޭގެ އަސަރު ވަރަށް ބޮޑަށް އިހުސާސްކުރެވޭނެއެވެ. ޑީހައިޑްރޭޝަންގެ ފުރަތަމަ އަލާމާތަކީ އާންމުކޮށް ކަރުހިއްކުމެވެ. މިއީ ހަށިގަނޑަށް އިތުރު ފެން ބޭނުންވާކަމުގެ ނިޝާނެކެވެ. އަނގައާއި ތުންފަތް ހިކިފައިވާކަން އިހުސާސްވުމަކީ އެކަށީގެންވާ މިންވަރަށް ފެން ނުލިބޭކަމުގެ ހެއްކެކެވެ.

ޑީހައިޑްރޭޝަންގެ އަނެއް ނިޝާނަކީ ކުޑަކަމުދާ ތަކެތީގެ ކުލަ ގަދަވުމެވެ. ޞިއްޙަތު ރަނގަޅު މީހެއްގެ ކުޑަކަމުދާ ތަކެތި ހުންނަންވާނީ ފަނޑު ރީނދޫ ކުލައެއްގައެވެ. އެހެންކަމުން، ކުޑަކަމުދާ ތަކެތީގެ ކުލަ ގަދަވުމުން ދޭހަވަނީ ފެންބުއިން އިތުރުކުރަން ޖެހިފައިވާ ކަމެވެ. މީގެ އިތުރުން، އާދަޔާ ޚިލާފަށް ވަރުބަލިވުމަކީވެސް ޑީހައިޑްރޭޝަންއާ ގުޅުން ހުރި ކަމެއް ކަމުގައި ވެދާނެއެވެ. ސަބަބަކީ އެކަށީގެންވާ މިންވަރަށް ފެން ނުލިބުމުގެ ސަބަބުން ހަށިގަނޑަށް ރަނގަޅަށް މަސައްކަތް ކުރުމަށް ދަތިވުމެވެ.

އަދި ހަމަ މިއާއެކު، ޑީހައިޑްރޭޝަންގެ ސަބަބުން ބޯ އެނބުރުން ނުވަތަ ބޮލުގައި ރިއްސުން ފަދަ ކަންކަން ކުރިމަތިވެއެވެ. ޚާއްޞަކޮށް އަވަހަށް ކުއްލިއަކަށް ތެދުވާއިރު ބޯއެބުރުން އަދި ރިއްސުން، މިފަދަ އަލާމާތްތައް ފެނުމަކީ ހަށިގަނޑަށް ފެން ބޭނުންވެފައިވާ ކަމުގެ ސާފު އިޝާރާތެކެވެ.

ކިހާވަރަކަށް ފެން ބޯންވާނެ ހެއްޔެވެ؟

ފެން ބޭނުންވާ މިންވަރު ތަފާތުވަނީ އުމުރު، ހަރަކާތްތެރިކަމުގެ މިންވަރު އަދި މޫސުމީ ޙާލަތަށް ބިނާކޮށެވެ. އާންމު އުސޫލެއްގެ ގޮތުން، ދުވާލަކު 8 ތަށި (64 އައުންސް) ފެން ބުއިމަށް ލަފާދެވެއެވެ. ނަމަވެސް، ޚާއްޞަކޮށް ހަރަކާތްތެރި ދިރިއުޅުމެއް އުޅޭ ފަރާތްތަކަށް ނުވަތަ ހޫނު މޫސުމެއްގައި ދިރިއުޅޭ ފަރާތްތަކަށް މިއަށްވުރެ އިތުރު މިންވަރެއް ބޭނުންވެދާނެއެވެ.

ހަށިގަނޑަށް ފުދޭ މިންވަރަކަށް ފެން ލިބޭތޯ ދެނެގަތުމުގެ ލުއިފަސޭހަ ގޮތެއް ވެއެވެ. އެއީ ކުޑަކަމުދާ އެއްޗެހީގެ ކުލަ ވަޒަންކުރުމެވެ. ކުޑަކަމުދާ ތަކެތި ފަނޑު ރީނދޫ ކުލައެއްގައި ހުންނަނަމަ ، އެއީ ހަށިގަނޑަށް އެކަށީގެންވާ މިންވަރަކަށް ފެން ލިބިފައިވާކަމުގެ ނިޝާނެކެވެ. އެހެންނަމަވެސް، ކުޑަކަމުދާތަކެތި ނުސާފު ކުލައެއްގައި ހުރުމުން ދޭހަވަނީ ރަނގަޅަށް ހައިޑްރޭޓް ވުމަށްޓަކައި އިތުރަށް ފެން ބޯން ޖެހޭ ކަމެވެ.

ހައިޑްރޭޝަނާއި ސިކުނޑި

ހަށިގަނޑު ހައިޑްރޭޓްވެފައި ހުރުމަކީ ހަމައެކަނި ޖިސްމާނީ ދުޅަހެޔޮކަމަށް މުހިންމު ކަމެއް ނޫނެވެ. އެއީ ސިކުނޑީގެ ހަރަކާތްތެރިކަމަށްވެސް ނުހަނު މުހިންމު ކަމެކެވެ. ކުޑަކޮށް ޑީހައިޑްރޭޓްވުމުން ވެސް މާނަސިކް ޙާލަތަށާއި، ސަމާލުކަމަށް އަދި ހަނދާނަށް ނޭދެވޭ އަސަރުތަކެއް ކުރެއެވެ. އެކަށީގެންވާ މިންވަރަށް ފެން ބުއިމަކީ ސިކުނޑީގެ މަސައްކަތް އެންމެ އެދެވޭ ގޮތުގައި ކުރުމަށް މަގުފަހިކޮށްދޭ ކަމަކަށްވާތީ، މުޅި ދުވަހު ވިސްނުންތޫނުކަމާއި ސަމާލުކަން ދެމެހެއްޓުމަށް އެހީތެރިވެދެއެވެ.

ފެނަކީ ޞިއްޙަތު ރަނގަޅުކޮށް ދެމެހެއްޓުމަށް އެންމެ ލުއިފަސޭހަ އަދި އެންމެ ފައިދާހުރި ވަސީލަތެވެ. ހަށިގަނޑު ރަނގަޅަށް ހައިޑްރޭޓްވެފައި ހުރުމުން ހަކަތައިގެ މިންވަރު އިތުރުވެ، ހަމުގެ ދުޅަހެޔޮކަން ދެމެހެއްޓި، ހަޖަމުކުރުމުގެ ނިޒާމު ހަރުދަނާވެ، އަދި ނަފްސާނީ ދުޅަހެޔޮކަންވެސް އިތުރުވެގެންދެއެވެ. ދުވަހުގެ ތެރޭގައި މެދުނުކެނޑި ގަވާއިދުން ފެންބުއިމާއި، ހަށިގަނޑުން ފެންމަދުވުމުން ދައްކާ ނިޝާންތަކަށް ސަމާލުވުމަކީ މުހިންމު ކަމެކެވެ. މި ކުޑަކުޑަ އާދަ ދެމެހެއްޓުމުން، ހަށިގަނޑު އެކަށީގެންވާ މިންވަރަށް ހައިޑްރޭޓްވެ، ދުޅަހެޔޮ ޞިއްޙަތެއްގައި ހުރެ، އެންމެ ފުރިހަމަ އިޙްސާސް ލިބިގަނެވޭނެކަން ކަށަވަރެވެ.