ސިވިލް ސާވިސް ކޮމިޝަން (ސީއެސްސީ) އިން ޚިދުމަތް ދޫކޮށްފައިވާ ނުވަތަ ދާއިމީ ވަޒީފާއަކަށް ވަންނަން ފަސްޖެހޭ ފަންނީ އަދި އިދާރީ މުވައްޒަފުން އަލުން ވަޒީފާއަށް ނެރުމަށް މަގުފަހިކޮށްދީފި އެވެ. މަޤްޞަދަކީ ރިކްރޫޓްމަންޓްގެ ގޮންޖެހުންތައް ހައްލުކޮށް، އެކި ދާއިރާތަކުން ތަޖުރިބާކާރު ޕްރޮފެޝަނަލުންނަށް ފުރުޞަތުތައް ހޯދައިދިނުމެވެ.
އަލަށް އެކުލަވާލާފައިވާ ގަވާއިދުގައިވާ ގޮތުން ވަޒީފާގެ ފުރުސަތުތައް ހުޅުވާލާނީ ހާއްސަ ދަފްތަރެއް މެދުވެރިކޮށެވެ. ކޮންމެ އިދާރާއަކުންވެސް ވަކިވަކި ފަރުދުންގެ ވަކި ބޭނުންތަކަށް ބަލައިގެން މިނިވަންކަމާއެކު ވަޒީފާއަށް ނެގޭނެއެވެ. މި ދަފްތަރު އެކުލަވާލުމަށް ސީއެސްސީން ވަނީ މުއައްސަސާތަކަށް އެއް އަހަރުގެ މުއްދަތެއް ދީފައެވެ.
Advertisement
ހޯމަ ދުވަހު އާންމު ކުރި ގަވާއިދުގައި ކަނޑައަޅާފައި ވަނީ އެކި ސަބަބުތަކާ ހުރެ ހިދުމަތުން ވަކިވެފައިވާ ފަރާތްތަކަށާއި ފުލްޓައިމް މަސައްކަތް ނުކުރަން އިސްކަންދޭ ފަރާތްތަކަށް ފުރުސަތު އިތުރުކުރާނެ ކަމަށެވެ. އަދި އޮފީހާ ދުރުގައި އުފެއްދުންތެރިކަމާއެކު ޒިންމާތައް އަދާކުރެވޭނެ މަގާމުތަކަށް ރިމޯޓް މަސައްކަތް ކުރުމުގެ ފުރުސަތު އޮތް ކަމަށް ވެސް ބެލެވެ އެވެ.
މީގެއިތުރުން، ކުރިން އިދާރީ މަޤާމުތަކުގައި ތިބި ރިޓަޔަރޑް ސިވިލް ސާވަންޓުންނަށްވެސް މިޤަވާޢިދުގެ ދަށުން އަލުން ވަޒީފާއަށް ވަދެވޭނެއެވެ. ނަމަވެސް ފްރަންޓް އޮފީސް ކައުންޓަރ ސާވިސް އަދި ސީނިއަރ މެނޭޖްމަންޓް ރޯލް ފަދަ މަގާމުތައް މި ލިސްޓުން ބާކީކޮށްފައިވެއެވެ.
ސީއެސްސީގެ ގަވާއިދުގައި ކަނޑައަޅާފައި ވަނީ ދިވެހި ސިވިލް ސާވިސްގެ ގާނޫނުގައިވާ ޝަރުތުތައް ފުރިހަމަވާ އަދި އުމުރުން 60 އަހަރުން ދަށުގެ މީހުން އެކަންޏެވެ. ވަޒީފާ ލިބޭނީ ވަގުތީ ގޮތުން، އުޖޫރަ ލިބޭ ވަޒީފާއެއްގެ އުސޫލުން ކަމަށާއި، މުވައްޒަފުން ދުވާލަކު މަދުވެގެން ހަތަރު ގަޑިއިރު މަސައްކަތް ކުރަން ޖެހޭނެ ކަމަށް ގަވާއިދުގައި ވެއެވެ. އަދި މުސާރަ ކަނޑައެޅޭނީ ދައުލަތުގެ މުސާރައިގެ އޮނިގަނޑާ އެއްގޮތަށެވެ.
އިތުރު ތަފްޞީލީ މަޢުލޫމާތު ހޯއްދެވުމަށް ކަމާބެހޭ ގަވާއިދު ސިވިލް ސަރވިސް ކޮމިޝަންގެ ވެބްސައިޓުން ލިބެން ހުންނާނެއެވެ.
