ރާއްޖޭގެ ކުޅިވަރު މުޖުތަމައުގެ އިހުތިރާމް ލިބިގެންވާ ހުސައިން ނަސީމް މިއަދު ހެނދުނުގެ ވަގުތެއްގައި އިންޑިއާގެ ރާޖްގިރިއްޔާ ހޮސްޕިޓަލުގައި ނިޔާވެއްޖެއެވެ. ފާއިތުވި އަހަރެއްހާ ދުވަހު ކެންސަރާ ކުރިމަތިލާން ޖެހުނު ހުސައިން އިންޑިއާއަށް ދިޔައީ ފައިގައި ލޭކޮޅެއް ގަނޑުވާތީ ކަމަށް ހަބަރު ލިބެއެވެ.
ހުސައިން ނަސީމް ނިޔާވިއިރު ދުނިޔޭގައި އަނބިކަނބަލުންނާއި ދެދަރިން އެބަތިއްބެވެ.
Advertisement
37 އަހަރަށްވުރެ ގިނަ ދުވަހު ސްޕޯޓްސް މިނިސްޓްރީއަށް ޚާއްސަވިއިރު، އެތަނުގައި އޭނާ މަޝްހޫރުވެފައިވަނީ މަޑުމައިތިރި ހިތްހެޔޮ އުޅުމަކުންނެވެ. އޭނާގެ މުހިންމު ޙިއްޞާތަކުގެ ތެރޭގައި މާލޭގައި ބާއްވާ މުބާރާތްތަކަށް ދަނޑުތަކާއި ކޯޓުތައް ތައްޔާރުކުރުމާއި ކުޅިވަރު ކުޅޭ ތަންތަނާއި ގުޅުންހުރި މަސައްކަތްތައް ހިމެނެއެވެ.
ކެންސަރަށް ފަރުވާ ހޯއްދެވި ނަމަވެސް ނަސީމްގެ މަސައްކަތަށް ޚާއްސަ ކޮމިޓްމަންޓް ދެމިއޮތްކަމަށް ކުޅިވަރު ވުޒާރާގައި އޭނައާއިއެކު މަސައްކަތްކުރި މީހުން ބުނެއެވެ.
ކުޅިވަރު ޑިވިޜަންގެ ސްޕޯޓްސް ސާވިސަސް ޑިޕާޓްމަންޓް އިސްކޮށް ހުރެ، ކުޅިވަރުގެ ވަސީލަތްތައް ބެލެހެއްޓުމާއި ތައްޔާރުކުރުމުގައި ވަރަށް މުހިންމު ދައުރެއް ހުސައިން ނަސީމް އަދާކުރިއެވެ.
